Bugun, 10-iyul kuni Senatning 54-yalpi majlisi boʻlib oʻtdi. Unda “Energiyani tejash, undan oqilona foydalanish va energiya samaradorligini oshirish toʻgʻrisida”gi qonun koʻrib chiqildi.

Mazkur qonun bilan energetika xavfsizligini taʼminlash, energiyani tejash hamda samaradorlikni oshirish, resurslardan oqilona foydalanish tartib-tamoyillari, elektr va issiqlik energiyasi, yoqilgʻi va noanʼanaviy energiya resurslaridan iqtisodiyot tarmoqlari hamda ijtimoiy sohada tejamli va samarali foydalanish vazifalari va qoidalari belgilab berilmoqda.

Shuningdek, unda energiyani tejash va energiya samaradorlik talablarini buzganlik, resurslarni meʼyoridan ortiq sarflaganlik uchun javobgarlik belgilash ham nazarda tutilgan. Qurilish va transport sohalarida, bino hamda inshootlarda, issiqlik taʼminoti va kommunal xizmat koʻrsatish korxonalarida, shuningdek, qishloq va suv xoʻjaligida energiyani tejash yoʻnalishlari belgilab berilmoqda.

Endilikda ushbu qonun 10 kun ichida imzolash uchun Prezidentga yuboriladi.