Urganch aeroporti uchish-qoʻnish yoʻlagida rekonstruksiya ishlari olib borilishi munosabati bilan 20-iyuldan 7-avgustga qadar yopiladi. Bu haqda “Uzbekistan Airports” xabar berdi.

Maʼlum qilinishicha, rekonstruksiya vaqtida oldindan rejalashtirilgan barcha reyslar Nukus aeroportiga yoʻnaltiriladi. Yoʻlovchilarga Nukus va Urganch aeroportlari oʻrtasida bepul transfer xizmati taqdim etiladi hamda yoʻlovchilar joʻnab ketish va uchib kelishda avtobuslar yordamida manzil aeroportiga olib boriladi.

Bunda, masalan, Urganchdan Moskvaga HY-9615 reysi bilan uchayotgan yoʻlovchilar Urganch aeroportiga soat 23:00 da yetib kelishi lozim. Jadvalga koʻra, avtobuslar yoʻlovchilarni Urganch aeroportidan soat 23:30 da olib ketadi. Soat 02:30 da yoʻlovchilar Nukus aeroportiga yetkaziladi va u yerdan Moskvaga uchadi. Moskvadan qaytgan yoʻlovchilarni Nukusdan Urganchga yetkazish jarayoni ham xuddi shunday tashkil etiladi. Nukus aeroportida chegara nazoratidan oʻtib, yuklarni qabul qilib olgan yoʻlovchilarni Urganchga yoʻl oladigan avtobuslar kutib turadi.

Shu maqsadda har bir yoʻnalish boʻyicha toʻliq avtobuslar qatnovi jadvali tuzib chiqilgan boʻlib, mazkur jadval bilan bu yerda tanishib chiqish mumkin.