Qozog‘iston Markaziy saylov komissiyasi Atom elektr stansiyasi qurilishi bo‘yicha referendumda ovoz berishning dastlabki natijalarini e’lon qildi, deb xabar bermoqda Tengrinews.kz.

7 oktyabr kuni o‘tkazilgan ovoz berishning dastlabki natijalariga ko‘ra, fuqarolarning 71,12 foizi yoqlab, 2 million 452 ming 71 nafar fuqaro qarshi ovoz berdi (komissiya qarshi ovoz bergan fuqarolarning foizini e’lon qilmagan).

Markaziy saylov komissiyasi (MSK) raisi Nurlan Abdirovning ma’lum qilishicha, referendumda qatnashish huquqiga ega Qozog‘iston fuqarolarining umumiy soni 12 million 284 ming 487 kishini tashkil qilgan. Ovoz berishda 7 million 820 ming 204 nafar fuqaro yoki ovoz berish huquqiga ega bo‘lgan fuqarolarning 63,66 foizi ishtirok etgan.

“Ikkala javob varianti tanlab olingan, ya’ni haqiqiy deb topilgan, lekin ovozlarni sanashda hisobga olinmagan saylov byulletenlari soni 82 729 tani tashkil etdi, javobini aniqlashning imkoni bo‘lmagan 130 267 nafar saylovchilarning ovozi haqiqiy emas deb topildi”, deydi Abdirov.

Markaziy saylov komissiyasi raisining qoʻshimcha qilishicha, respublika referendumi va saylov toʻgʻrisidagi konstitutsiyaviy qonunlarga muvofiq, referendum oʻtkazuvchi hududiy komissiyalar ovozlar sanab oʻtilgandan keyin ikki kun ichida har bir hudud boʻyicha bayonnomalarning asl nusxasini taqdim etishi shart.

Eslatib o‘tamiz, atom elektr stansiyasi bo‘yicha referendum 6-oktabr, yakshanba kuni soat 07:00 dan 20:00 gacha bo‘lib o‘tdi. Referendum oʻtkazuvchi Markaziy komissiya maʼlumotlariga koʻra, soat 20:00 holatiga koʻra saylovchilarning dastlabki ishtiroki 63,87 foizni tashkil qilgan. Jami 7 820 918 kishi ovoz bergan.

Qayd etish kerak, AQSh Savdo-sanoat palatasi katta vitse-prezidenti Xush Choksi ishbilarmon delegatsiyaning Qozog‘istonga tashrifi doirasida Olmaotada jurnalistlar savollariga javob berar ekan, Qo‘shma Shtatlar mamlakatda atom elektr stansiyasi qurilishida ishtirok etish istagini bildirdi.

“Ha, biz Qozog‘istonda atom elektr stansiyasini qurish yoki rivojlantirishda albatta ishtirok etishni xohlaymiz, chunki AQShda atom elektr stansiyalarini loyihalash, qurish va ulardan foydalanish sohasida ilg‘or texnologiyalar mavjud va Qozogʻiston hududida atom elektr stansiyasini qurish boʻyicha muzokaralar olib borildi”, deydi u.

Eslatib o‘tamiz, Qozog‘iztonda AES qurilishi bo‘yicha referendumida o‘tkazilgan ekzitpol natijalari e’lon qilingandi. Referendum natijalariga ko‘ra, aholi tomonidan AES qurilishi qo‘llab-quvvatlangandi.