“O‘zenergoinspeksiya” matbuot xizmati ma’lum qilishicha, Bulung‘ur tumanidagi nonvoyxonada tabiiy gazdan noqonuniy foydalanish holati tekshiruv davomida aniqlangan. Fuqaro X.K. «Mehrjon» MFYda joylashgan o’ziga tegishli nonvoyxona uchun yerosti gaz tarmog‘iga o‘zboshimchalik bilan ulanishni amalga oshirib, so‘ngra gazdan noqonuniy tarzda foydalanishni boshlagan.

Ushbu qoidabuzarlik natijasida dastlabki hisob-kitoblarga ko‘ra, gaz ta’minoti korxonasiga 660 million so‘m miqdorida zarar yetkazilganligi aniqlangan. Hozirda mazkur holat yuzasidan huquqni muhofaza qiluvchi organlarga tegishli hujjatlar yuborilgan va ish qonuniy tartibda ko’rib chiqilmoqda.

Eslatib o’tamiz,avvalroq, boshqa viloyatlarda ham shunga o’xshash holatlar aniqlangan edi. Masalan, Namangan viloyatidagi nonvoyxonada 273 million so‘mlik, Jizzaxda esa qariyb 700 million so‘mlik tabiiy gazdan noqonuniy foydalanish holatlari ro‘y bergan. Bundan tashqari, Farg‘ona viloyatida 5 ta nonvoyxona tomonidan jami 771 million so‘mdan ortiq gazdan noqonuniy foydalanish holatlari aniqlangan. Urganch tumanida esa, 2 milliard so‘mdan ortiq tabiiy gazdan noqonuniy foydalanish holatiga yo‘l qo‘yilgan.