Tashqi ishlar vazirligining xabariga ko’ra, 2024-yil 1-dekabr kuni Xitoyning Chendu shahrida O‘zbekiston va Xitoy Xalq Respublikasi hukumati o‘rtasida o‘zaro vizadan ozod qilish to‘g‘risidagi bitim imzolandi. Ushbu kelishuv O‘zbekiston va Xitoy fuqarolariga ikki davlat hududlariga 30 kungacha viza talablaridan ozod bo‘lib safar qilish imkoniyatini yaratadi.

Bitimga ko‘ra, O‘zbekiston va Xitoy fuqarolari ikki davlat hududlariga kirish, chiqish yoki tranzit qilish uchun viza olish shartidan ozod etiladi. Hujjatni imzolash, ikki davlat o‘rtasidagi savdo, turizm va madaniy aloqalarni yanada faollashtirish, xalqlar o‘rtasidagi o‘zaro anglashuvni rivojlantirishga xizmat qiladi.