Prezidentning «Davlat xaridlarida ishlab chiqaruvchilarni qo‘llab-quvvatlash hamda ularga keng imkoniyatlar yaratish bo‘yicha qo‘shimcha chora-tadbirlar to‘g‘risida»gi qarori 2025-yil 1-yanvardan kuchga kiradi. Ushbu qaror doirasida, davlat xaridlarida mahalliy ishlab chiqaruvchilarni qo‘llab-quvvatlash va ularni samarali rivojlantirish maqsadida bir qator yangi mexanizmlar joriy etiladi.

Ishlab chiqaruvchilar ekotizimi:
– Hududlar va tovarlar bo‘yicha ishlab chiqaruvchilar haqida ma’lumotlarni aks ettiruvchi sanoat xaritasi ishlab chiqiladi;
– Davlat va ishlab chiqaruvchilar o‘rtasidagi hamkorlikni kuchaytirish maqsadida, ular o‘rtasida o‘zaro kooperatsiya aloqalari o‘rnatiladi, shuningdek, off-take (oldindan buyurtma) shartnomalari tuzish imkoniyatlari yaratiladi;
– «B2B» va «B2C» formatlarida ishlab chiqaruvchilar uchun ochiq va erkin savdo maydonchasi tashkil etiladi. Bu esa o‘z navbatida, ishlab chiqaruvchilarning mahsulotlarini keng auditoriyaga taqdim etish imkoniyatini yaratadi.

Iqtisodiyot va moliya vazirligi, ishlab chiqaruvchilar ekotizimining to‘liq joriy etilishi va uning barqaror ishlashini ta’minlash uchun mas’ul tashkilot sifatida belgilandi. Shuningdek, “davlat xaridlari – biznesga ko‘mak” tamoyili asosida “tadbirkorbay” tizimi joriy etiladi.

Bundan tashqari, ishlab chiqaruvchilarga barcha davlat xaridlari elektron tizimlarida quyidagi imtiyozlar beriladi:
– Vositachilik yig‘imi 50 foizga kamaytiriladi;
– Xarid qilish jarayonida qo‘shimcha zakalat to‘lovlari kiritilmaydi.