Prezidentning “O‘zbekiston–2030 strategiyasini Atrof-muhitni asrash va yashil iqtisodiyot yilida amalga oshirishga oid davlat dasturi to‘g‘risida”gi farmoni jamoatchilik muhokamasiga qo‘yildi.

Loyihada 2025-yilning 1-mayidan boshlab Toshkent, Nukus va viloyat markazlarida ayrim sohalarda yangi loyihalarni amalga oshirishni taqiqlash taklif etilmoqda. Bu qatorga asbest, sement ishlab chiqarish, qattiq chiqindilarni qayta ishlash va ba’zi metallurgiya tarmoqlari kabi ekologik xavfli sanoat sohalari kiradi. Bunda ko‘mir yoqish texnologiyalaridan foydalanish, chang va gaz tozalash inshootlarining yetishmasligi kabi omillar ham inobatga olinadi.

Loyiha taklifiga ko‘ra, «Yevro-4″ standartidan past ekologik toifadagi motor yonilg‘isi bo‘lgan AI-80 benzinini ishlab chiqarish va sotishni 2025-yilning oxirigacha bosqichma-bosqich cheklash rejalashtirilmoqda.

Loyihada shuningdek, 1-noyabrgacha plastik qadoqlarni yig‘ib olish va utilizatsiya qilish bo‘yicha qonun loyihasini ishlab chiqish taklif etilmoqda. Bu qadam plastik chiqindilarning salbiy ta’sirini kamaytirish maqsadida amalga oshiriladi. Plastik qadoqlarni qayta ishlash va utilizatsiya qilish uchun maxsus joylar tashkil etiladi.

2024-yilda Energetika vazirligi tomonidan » Gazeta.uz»ga ma’lum qilganidek, O‘zbekistonda 2026-yilgacha AI-80 markali benzin ishlab chiqarishdan butunlay voz kechish rejalashtirilgan. Shavkat Mirziyoyev 2025-yilga kelib AI-80 benzinini to‘liq muomaladan chiqarishni «aniq» belgilab, Bosh vazir Abdulla Aripovga tegishli topshiriqlarni bergan edi.