Samarqand va Jizzax viloyatlaridagi 100 ta umumta’lim maktabiga qatnaydigan o‘quvchilar uchun avtobuslar 2025-yil sentyabrigacha yo‘lga qo‘yilishi kutilmoqda. Ushbu tashabbus davlat dasturi doirasida amalga oshiriladi va avtobuslar autsorsing asosida faoliyat yuritadi.

Moliyalashtirish mahalliy budjetdan ta’lim sohasi uchun ajratilgan mablag‘lar doirasida amalga oshiriladi.

Samarqand va Jizzax viloyatlarining olis hududlaridan maktabga qatnaydigan o‘quvchilar uchun avtobuslar tashkil etilishi davlat dasturiga kiritilgan bo‘lib, bu amaliyot «O‘zbekiston – 2030» strategiyasining bir qismi sifatida 2023-yilda belgilangan chora-tadbirlar rejasida  ko‘rsatilgan. Avtobuslarni tashkil etish uchun Transport vazirligi, Iqtisodiyot va moliya vazirligi hamda Ichki ishlar vazirligi mas’ul etib tayinlangan.

2023-yilda Shavkat Mirziyoyev prezidentlikka nomzod sifatida Nukusda o‘tkazgan uchrashuvida maktab avtobuslarini joriy etishni Qoraqalpog‘istonning chekka hududlaridan boshlashini ta’kidlagan edi.

2021-yilda YUNISEF va IIV YHXBB tomonidan o‘tkazilgan so‘rovda Toshkent shahridagi ko‘plab respondentlar maktabga olib boruvchi yo‘llarning xavfsiz emasligini bildirgan. Aksariyat o‘quvchilar maktabga piyoda borishga majbur bo‘lsa, ba’zi hududlarda esa bolalarni tashishda Damas va yengil avtomobillaridan foydalaniladi. Bu holat xavfsizlikni ta’minlashda jiddiy muammolarni keltirib chiqarmoqda.