Ўзбекистон ва Япония 2025 йилнинг 21 январида янги онлайн платформа – «Japan Career» порталини ишга туширди. Бу ҳақда Миграция агентлиги матбуот хизмати хабар берди.

Бу лойиҳа икки давлат ўртасидаги меҳнат миграцияси, таълим ва яшаш имкониятларини янада ривожлантиришга қаратилган. «Japancareer.uz» портали ўзбек, рус ва япон тилларида ишлаб чиқилган бўлиб, фойдаланувчиларга Японияда ўқиш, ишлаш ва яшаш бўйича батафсил маълумот беради.

Порталнинг 7 та бўлимида Японияга сафар қилиш учун зарур маълумотлар, виза турлари, яшаш ҳуқуқи, япон тилини ўрганиш бўйича қўлланмалар, мамлакатнинг кундалик ҳаёти, транспорт ва солиқлар ҳақида батафсил маълумотлар тақдим этилади. Шунингдек, япониялик иш берувчиларга ўзбекистонлик мутахассисларнинг малакаси ва салоҳияти билан танишиш имконияти яратилган.

JICA (Япония халқаро ҳамкорлик агентлиги) президенти Акиҳико Танака таъкидлаганидек, Японияда қишлоқ хўжалиги ва кексаларни парваришлаш соҳаларида ишчи кучига эҳтиёж катта. Бундан ташқари, Ўзбекистонда ишга туширилган портал ёрдамида, ёшлар ўз малакаларини ошириб, Японияда ўқиш ва ишлаш имкониятларига эга бўладилар. Ҳозирги кунда Японияда 6 мингдан ортиқ ўзбекистонлик фуқаро вақтинчалик меҳнат қилмоқда.

Портал фойдаланувчиларига Япониядаги яшаш ва ишлаш шароитларини яхшилаш учун янги имкониятлар тақдим этилади. Android фойдаланувчилари мобил илова орқали порталга кира оладилар, шунингдек, чатбот ёрдамида мурожаатлар қабул қилинади. Японияда ўқиш ва ишлашни хоҳловчилар учун кўпроқ малака ошириш курслари ташкил этиш, Япониянинг йирик иш берувчилари билан ҳамкорликни кенгайтириш режалаштирилган.

Порталнинг асосий мақсадларидан бири ўзбекистонлик фуқароларнинг Японияда ижтимоий-ҳуқуқий ҳимоясини таъминлашдир. Шу мақсадда Японияда Миграция агентлигининг ваколатхонасини очиш кўзда тутилган. Бу, ўз навбатида, ўзбекистонликларга Японияда ишлаш жараёнида кўрсатиладиган ёрдамни янада кучайтиради.

«Japan Career» портали фаолиятини, «Telegram«, «YouTube» ва «Instagram» ижтимоий тармоқлари орқали ҳам кузатиш мумкин.