Электрон логистика порталининг мобил иловаси ишга туширилди

Электрон логистика порталининг ишга туширилган мобил иловаси орқали электрон савдоларга тегишли бўлган жараёнларни бошқариш, шу жумладан, буюртмаларга нарх таклифларини бериш, зарур маълумот ва шартномаларни юклаб олиш мумкин

Ўзбекистон товар-хом ашё биржаси e-logistika.uzex.uz электрон логистика порталининг E-Logistics мобил иловаси тест режимида ишга туширилди. Бу ҳақда UzEx расмий сайтида хабар берилди.

Маълум қилинишича, мазкур илова орқали фойдаланувчилар логистика порталида амалга ошириладиган барча электрон савдоларга тегишли бўлган жараёнларни бошқариш, шу жумладан, буюртмаларга нарх таклифларини бериш, зарур маълумот ва шартномаларни юклаб олиши мумкин.

Мобил иловада, шунингдек, янги савдо иштирокчилари учун электрон рақамли имзо орқали онлайн тарзда рўйхатдан ўтиш имконияти ҳам яратилган.

Бундан ташқари, юк ташувчилар иловада ёқилғи қуйиш шохобчалари ва бошқа зарур хизмат кўрсатиш объектларининг манзилларини акс эттирувчи интерактив харитадан фойдаланиши ҳам мумкин.

Ўз навбатида, тизимда рўйхатдан ўтмаган фойдаланувчилар мобил иловадан фойдаланган ҳолда порталга жойлаштирилган буюртмалар шартлари билан тўлиқ танишиш, харитада тегишли йўналишларни кўриш (Yandex харита орқали) ва амалга ошган битимлар хақида маълумотларни олиш ҳамда мижозларни кўллаб-қувватлаш маркази билан боғланиш имкониятига эга.

Шу билан бирга, қисқа муддатларда юк ортирилган транспорт воситаларнинг ҳаракатланишини мобил илова орқали онлайн тарзда кузатиш хизматининг ишга туширилиши ҳам кутилмоқда.

E-Logistics мобил иловасини Google Play’да юклаб олиш мумкин.

Аввалроқ Тошкент автовокзалидан автобусларга чипталарни электрон шаклда сотиб олиш мумкин бўлган UzBus мобил иловаси ишга туширилгани ҳақида хабар берилганди. Иловада йўловчилар реал вақт режимида автовокзалдан шаҳарлараро ва халқаро рейслар жадвали билан танишиш, танланган йўналиш бўйича чипталар нархини билиш имкониятига эга бўлади.

Koʻrishlar soni: 1 558