Энергетика вазири Жўрабек Мирзамаҳмудов мамлакатда энергия самарадорлигини ошириш ва қайта тикланувчи энергия манбаларидан фойдаланишни кўпайтириш бўйича янги дастур ишлаб чиқилаётганини маълум қилди.Бу ҳақда вазир президент раислигида ўтказилган йиғилишдан сўнг «Ўзбекистон 24» телеканалига берган интервьюсида айтиб ўтди.

Шунингдек, вазир «яшил» энергия улушини 26 фоизга етказиш учун ишга тушириладиган 3,5 ГВт генерация қувватларига қўшимча равишда яна 1 ГВт «яшил» энергия қувватини яратиш бўйича кўрсатма берилганини қайд этди.

«Икки йил ичида 3 мингга яқин кичик гидроЭлектр станцияларини қуриш ҳамда аҳоли ва хўжалик юритувчи субъектлар бинолари томининг камида 50 фоизида қуёш панеллари ва сув иситиш тизимини ўрнатиш бўйича дастур ишлаб чиқиш топширилди,» – деди вазир.

2030 йилгача мамлакатда 19 минг МВт «яшил» энергия қувватларини барпо этиш орқали қайта тикланувчи энергия улушини 54 фоизга етказиш мўлжалланган. Буни амалга ошириш учун янги ишлаб чиқариш қувватларини барпо этиш ва энергия самарадорлиги паст бўлган корхоналарни модернизация қилиш режалари ишлаб чиқилмоқда.