Россия компаниялари 7 минг нафар ўзбекистонликни иш билан таъминлашни режалаштирмоқда
Шу билан бирга, Россияга мигрантларга қарши сиёсат кучаймоқда. Хусусан, куни кеча Россиянинг Либелар-демократик партияси етакчиси бошчилигидаги бир гуруҳ депутатлар меҳнат шартномаси муддати узайтирилмаган бўлса, хорижликларнинг Россияни тарк этишини талаб қилувчи қонун лойиҳаси ташаббускори бўлди.
Россиянинг йирик иш берувчилари билан шартномалар имзоланди, деб хабар беради Вазирлар Маҳкамаси ҳузуридаги Миграция агентлиги.
Қайд этилишича, Москвадаги Ўзбекистон элчихонасида Миграция агентлиги директори Беҳзод Мусаев Россияда фаолият олиб бораётган 20 га яқин йирик компаниялар раҳбарлари билан учрашув ўтказган.
Мулоқот томонлар учун самарали кечди. Якунда «ANT YAPI», «ОЗОН КОМЮНИТИ», «ПЭК» ва «СПАР МИДЛ ВОЛГА» компаниялари билан 7000 нафар ўзбекистонликни мазкур компанияларга ташкилий тарзда ишга жойлаштириш бўйича ҳамкорлик шартномалари имзоланган.
Ушбу компанияларнинг ишчиларга яратган шароитлари, ойлик маошлари тўлиқ ўрганиб чиқилган. Февраль ойида ҳудудларда номзодларни саралаш тадбирлари бўлиб ўтади.
Шу билан бирга, Россияга мигрантларга қарши сиёсат кучаймоқда. Хусусан, куни кеча Россиянинг Либелар-демократик партияси етакчиси Леонид Слуцкий бошчилигидаги бир гуруҳ депутатлар меҳнат шартномаси муддати узайтирилмаган бўлса, хорижликларнинг Россияни тарк этишини талаб қилувчи қонун лойиҳаси ташаббускори бўлди.
«Чет эл фуқароси муддатли меҳнат шартномасининг амал қилиш муддати тугаганидан кейин ёки муддатидан олдин бекор қилинганидан кейин 10 иш куни ичида Россия ҳудудини тарк этиши шарт. Чет эл фуқароси охирги муддатли меҳнат шартномасининг амал қилиш муддати тугаган кундан бошлаб 20 иш кунидан кечиктирмай янги муддатли меҳнат шартномасини тузган ҳоллар бундан мустасно», дейилади қонун лойиҳасида.
Ундан олдин Россияда мигрантларнинг пул ўтказмаларидан давлат божи ундириш таклиф этилди. Депутат чет эл фуқароларининг трансчегаравий ўтказмалари учун давлат божини жорий этиш зарурлигини айтиб, ўтган йил якунларига кўра Қирғизистон ва Ўзбекистон фуқаролари Россиядан ўз мамлакатига 14 миллиард доллардан ортиқ маблағ ўтказганини таъкидлаган.
