Марказий банк Ўзбекистонда нақд пульсиз ҳисоб-китобларда универсал тўлов QR-кодини яратишни режалаштирмоқда. Бу ҳақда Марказий банкнинг Тўлов тизимлари департаменти раҳбари ўринбосари Миразиз Мирҳаётов маълум қилди.

Мирҳаётовнинг қайд этишича, ҳозирда савдо нуқталарида тадбиркорлар томонидан кўпинча QR-кодли бир нечта тахтачалар ўрнатилган бўлади, бу эса харидорларга ноқулайликлар туғдиради, деди у.

«Биз ягона стандарт яратишни мақсад қилганмиз. Унга кўра, ташкилотда QR-код ўрнатилади ва мижоз унинг ёрдамида ўзи хоҳлаган мобил илова ёки тўлов хизмати орқали тўловни амалга ошириш имкониятига эга бўлади», — деди Мирҳаётов.

Регулятор Тўлов тизимлари департаменти раҳбари ўринбосарининг қўшимча қилишича, ушбу QR-кодни ишлаб чиқиш учун бир йил вақт керак бўлади.

Марказий банк маълумотларига кўра, 2024 йилда индивидуал QR-код олган тадбиркорлар сони 108 мингдан ошган. QR-кодлар орқали амалга оширилган тўловлар ҳажми қарийб 31 фоизга ошиб, 441,79 млрд сўмни ташкил этди.

QR-кодлар орқали тўловнинг афзалликлари қаторида POS-терминалларни ўрнатиш заруратининг йўқлиги таъкидланади Марказий банкда. Бу бизнес учун харажатларни камайтиради. Шунингдек, амалга оширилган интеграция туфайли солиқ кешбеки автоматик равишда ҳисобланиши ҳам афзалликлар қаторига киритилган.