Март ойида аҳолининг келаси 12 ой учун инфляцион кутилмалари ўтган ойга нисбатан пасайиб, 14,2 фоиз даражасида шаклланди. Бу ҳақда Марказий банк ўтказган сўровнома натижаларида айтилади.

Тадбиркорлик субъектларининг инфляцион кутилмалари ҳам ўтган ойга нисбатан секинлашиб, 13 фоизни ташкил этди.

Март ойида сўровнома иштирокчиларининг 52 фоизи (ўтган ойга нисбатан -6 фоиз) келгусида нархларга оширувчи босим кўрсатиши мумкин бўлган асосий омил сифатида коммунал хизматлар нархининг ўсишини қайд этди.

Шунингдек, ой давомида валюта курси ўзгариши нархларга оширувчи таъсир ўтказишини қайд этган респондентлар улуши ўзгармаган — 43 фоиз. Транспорт харажатларининг ошиши ва нархларнинг сунъий оширилишини қайд этган респондентлар улушида ҳам камайиш қайд этилган (-3 фоиз).

Келгусида нархларга оширувчи босим кўрсатиши мумкин бўлган асосий омилар сифатида коммунал хизматлар, ёқилғи ва энергия ресурслари қимматлашиши, транспорт харажатлари ҳамда хомашё нархларининг қимматлашишини белгилаган тадбиркорлар улуши камайган.

Бундан ташқари, аҳолининг юқори инфляцион кутилмалари таълим соҳаси вакиллари томонидан билдирилган бўлса, келгусида нархлар шаклланиши бўйича нисбатан паст кутилмалар туризм соҳаси вакиллари томонидан қайд этилди.

Аҳоли инфляцион кутилмаларининг юқори кўрсаткичи Тошкент шаҳрида кузатилган бўлса, нисбатан паст инфляцион кутилмалар Қашқадарё вилоятида истиқомат қилаётган аҳоли томонидан қайд этилди. Шунингдек, март ойи якунларига кўра, аҳоли томонидан сезилган инфляция даражаси ўтган ойга нисбатан пасайиб, 14,3 фоизни қайд этди.