Fitch Ratings Ўзбекистонда кичик ва ўрта бизнесни фаол кредитлашда хатарларни кўрмоқда. Бу ҳақда 16 апрель куни рейтинг агентлиги конференциясида Fitch банк сектори директори Павел Каптел маълум қилди, дея хабар бермоқда Spot.

Агентлик вакилининг таъкидлашича, чакана кредитлаш ривожланмоқда, бу эса банк секторининг долларлашув даражасини ва кредитлар концентрациясини пасайтиради, шунингдек, банклар учун янада фойдали сегмент ҳисобланади.

Бироқ, унинг фикрича, чакана кредитлаш бозорида қизиш хавфи мавжуд бўлиб, бу келгусида активлар сифати билан боғлиқ муаммоларга олиб келиши мумкин.

Шунингдек, Каптел сўнгги йилларда чакана кредитлашнинг юқори хатарли сегментлари, жумладан, автокредитлар ва оилавий кредитлар бўйича бир қатор қатъий чекловларни жорий этган Марказий банкнинг фаол ҳаракатларини қайд этди, бу эса истеъмол кредитлари ўсишини секинлаштирди.

«Микроқарз ва микрокредитларга эътибор қаратсак, бу соҳада вазият анча барқарор, йилдан йилга сезиларли даражада ўсиш кузатилмоқда. Шубҳасиз, бу ерда паст база кўрсаткичи таъсири бор, бу эса юқори ўсишни изоҳлайди. Шу билан бирга, биз аҳолининг ҳаддан ташқари қарздорлик хатари мавжудлигини тан оламиз. Шу сабабли, яқин келажакда Марказий банк томонидан потенциал хатарларни олдини олиш бўйича навбатдаги чора-тадбирлар кўрилишини кутмоқдамиз», — дея таъкидлади у.

Бундан ташқари, Fitch банк сектори директори кичик ва ўрта бизнесга эътибор қаратди, уни ҳукумат иқтисодий ўсиш ва аҳоли бандлигини ошириш драйвери сифатида ривожлантиришни мақсад қилган. Бироқ Каптелнинг таъкидлашича, ўрта муддатли истиқболда бу банклар учун активлар сифати билан боғлиқ хатарларни келтириб чиқариши мумкин.

Ўз навбатида, Марказий банк томонидан микро ва кичик бизнесни кредитлаш бўйича банкларга қўйиладиган талабларнинг соддалаштирилиши кичик ва ўрта бизнес сегментини кредитлаш ўсишининг тезлашишига олиб келади. Fitch беқарор тармоқларда, жумладан, қишлоқ хўжалиги, тўқимачилик саноати, қурилиш саноатида хатарларнинг шаклланишини диққат билан кузатиш ниятида.

Каптелнинг сўзларига кўра, кичик ва ўрта бизнесни кредитлашда яна бир хатар — бу валюта кредитлари, бироқ қарз олувчиларнинг фақат кичик қисмида экспорт валюта тушуми мавжуд. Бундан ташқари, Ўзбекистонда валюта хатарларини суғурталаш воситалари мавжуд эмас.