Яна иккита хорижий интернет-компанияси Солиқ қўмитасида қўшилган қиймат солиғи тўловчиси сифатида рўйхатдан ўтказилди. Бу ҳақда Йирик солиқ тўловчилар бўйича ҳудудлараро солиқ инспекцияси матбуот хизмати маълум қилди.

15 апрель куни молия ва бизнес маълумотлари терминали, таҳлил воситалари ва янгиликлар тизимини тақдим этувчи Американинг Bloomberg LP компанияси Ўзбекистонда солиқ ҳисобига қўйилди.

Бундан ташқари, шу куни қўмитага Reach эквайринг-платформасининг Буюк Британиядаги юридик шахси With Reach UK Ltd рўйхатдан ўтди.

Ҳозирда рўйхатга Alibaba Cloud, eBay ва OpenAI каби онлайн хизматлар соҳасидаги 69 та компания киритилган.

2024-йилнинг кузида Ўзбекистон фонд бозори IT-инфратузилмасининг Bloomberg билан интеграцияси якунланди. Терминал фойдаланувчилари учун Тошкент фонд биржасида акциялар ва облигациялар котировкаси ҳамда буюртмалар китоблари ҳақидаги маълумотлар мавжуд бўлди. Орадан кўп ўтмай, платформага Республика валюта биржаси (ЎзРВБ) ҳам уланди.