Дунёнинг нуфузли бизнес мактабларидан бири — Швейцария Халқаро бошқарув институти (IMD) Лондон фонд биржасида рўйхатга олинган, Грузия ва Ўзбекистондаги етакчи молиявий хизматлар ҳамда рақамли банк экотизими оператори бўлган TBC Bank Group ҳақида муваффақиятли ривожланиши тадқиқотини эълон қилди. Тадқиқотда, банк қандай қилиб минтақанинг етакчи молиявий хизматлар таъминотчилари қаторига киришга муваффақ бўлгани кўриб чиқилган.

«TBC Bank Group: Вақт синовидан ўтган муваффақият тарихи» номли материал компаниянинг ўзига хос ривожланиш йўлини таҳлил қилади ва IMD томонидан молиявий хизматлар бизнесини ривожланаётган бозорларда технологияларга таянган ҳолда муваффақиятли кенгайтириш бўйича ўқув материали сифатида қўлланилади.

Кейсда гуруҳнинг молиявий хизматлар соҳасида қандай қилиб етакчиликка эришгани ва халқаро кенгайишни бошлагани ёритилган, хусусан, компаниянинг Ўзбекистон чакана банк бозорида қисқа вақт ичида ишончли позицияни эгаллагани ҳамда Марказий Осиёдаги етакчи рақамли банк экотизимига айлангани ҳақида сўз боради.

IMD, шунингдек, TBC Bank Group’нинг ўсишига хизмат қилувчи муҳим йўналишлардан бири бўлган халқаро ривожланиш стратегиясини ёритади. Грузия бозорида етакчи ўринни эгаллаган TBC, рақамли молиявий хизматларни илгари суриш учун аҳоли зич яшайдиган, ривожланаётган, катта ўсиш салоҳиятига эга ва бундай хизматлар етарли даражада кириб бормаган бозорларда янги имкониятларни излай бошлади. Ўзбекистон ушбу йўналишдаги биринчи бозор бўлди. TBC Group бу ерда 2019 йил фаолиятини бошлаган ва шундан бери бутун минтақа учун муҳим бўлган рақамли банк экотизимини қуриш ва кенгайтириш устида ишламоқда. Финтехнинг учта тез суръатда ривожланаётган йўналишида фаолият юритаётган TBC Uzbekistan ишга туширилганидан атиги икки йил ўтиб фойда кўра бошлади – бу эса жаҳон миқёсидаги рақамли банклар орасида рекорд даражадаги тезкор натижа ҳисобланади.

Ҳозирда TBC Узбекистан хизматларидан фойдаланувчи мижозлар сони 18,4 миллионга етган бўлиб, бу – мамлакат аҳолисининг қарийб ярмига тенг. Банкнинг кредит портфели ҳар йили икки баравар ошаётган бўлса, 2024 йилда олинган соф фойда 41 миллион АҚШ долларини ташкил этди. TBC Uzbekistan аллақачон ғуруҳ натижаларига сезиларли ҳисса қўшмоқда, ва бу улуш келажакда янада ошиши кутилмоқда.

«Биз IMD бизнес мактабининг қизиқиш билдирганидан ва уларнинг Грузиядаги маҳаллий банкдан муваффақиятли халқаро рақамли банк операторигача бўлган йўлимизни чуқур таҳлил қилганидан мамнунмиз. Грузия ва Ўзбекистон каби илгари етарлича эътибор қаратилмаган бозорлардаги бизнесимизни жаҳон ҳамжамиятига таништириш – биз учун катта шараф. Биз ривожланишда давом этар эканмиз, ўсиш учун янги имкониятларни излаш ва акциядорларимиз учун яхши молиявий натижаларни таъминлашга интиламиз», — дейди TBC Bank Group бош директори Вахтанг Бутскрихидзе.

Таҳлилий тадқиқотнинг қисқача шарҳи билан қуйидаги ҳавола орқали танишишингиз мумкин.

Халқаро бошқарув тараққиёти институти (IMD) – бизнес етакчиларини тайёрлашга киришган илк муассасалардан бири бўлиб, бу борада 75 йилдан ортиқ тажрибага эга. Институт Швейцарияда бизнесменлар учун бизнесменлар томонидан ташкил этилган бўлиб, бугунги кунда инновацион ёндашувлари билан бутун дунёда тан олинган. IMD’нинг асосий кампуслари Лозанна ва Сингапурда жойлашган бўлиб, Шэнчжэн шаҳрида Менежмент Ривожланиш Маркази, Кейптаунда эса Инновациялар Марказига эга. Институтнинг таълим фаолияти нафақат жисмоний шахслар, балки компаниялар томонидан ҳам юқори даражада ишонч билан эътироф этилган.