Марказий банк Ўзбекистонда муддатли тўлов бозорини тартибга солишни бошлашни режалаштирмоқда. Бу ҳақда 2 май куни Халқаро валюта жамғармаси конференциясида регулятор бошқаруви раиси Тимур Ишметов маълум қилди.

Унинг қайд этишича, Марказий банк асосий эътиборни «тартибга солинмайдиган, аммо маълум бир хатарларни келтириб чиқарувчи» янги ривожланаётган бозорларга қаратади. Улардан бири BNPL («Buy now pay later» — «Ҳозир ол, кейин тўла») бўлиб, у «ҳозирда сезиларли ҳажмга етган».

«Биз аллақачон [BNPL] бозори ўйинчилари билан бир неча бор учрашувлар ўтказганмиз ва банклар томонидан аҳолининг қарз юкида [бўлиб-бўлиб тўлашни] ҳисобга олиш ва мижозларнинг етарли даражада ҳимоясини таъминлаш учун ушбу соҳани тартибга солишни жорий этишни режалаштираётганимизни айтганмиз», — деди регулятор раҳбари.

Январь ойида Марказий банк ҳозирда банк назоратидан ташқарида бўлган муддатли тўловлар бозорини тартибга солиш имкониятини кўриб чиқаётгани маълум бўлганди. Хусусан, товарларни бўлиб-бўлиб тўлаш шарти билан тақдим этувчи ташкилотларга маълумотларини кредит бюроларига тақдим этиш мажбуриятини юклаш режалаштирилган.

Бундан ташқари, Марказий банк микроқарзлар бўйича ортиқча тўловнинг максимал миқдорини чеклайди — бу йилига 50 фоиз. Микроқарзлар бўйича чекланган кунлик ставка ҳам 0,3 фоиздан 0,25 фоизгача пасайтирилмоқда.

Қарз олувчининг қарз юки кўрсаткичи ўртача ойлик даромадга нисбатан микроқарзлар бўйича ўртача ойлик тўловлар суммасининг 50 фоизи миқдорида белгиланди. Янги талаблар 24 июлдан кучга киради.