Ўзбекистондаги учта компания Украина санкцияларига учради
Украина Ўзбекистонга тегишли учта юридик ва битта жисмоний шахсга нисбатан санкциялар жорий этди. Президент Владимир Зеленский 9 май санасида тегишли фармонларга имзо чекди.
RBC нашрининг ёзишича, фармон билан санкциялар рўйхатига Россиянинг 67 та, Хитой, Эрон, Беларусь ва Ўзбекистонда рўйхатдан ўтган 7 та компания, шунингдек, Россиянинг 58 нафар фуқароси киритилган.
Санкцияларга ҳарбий-саноат мажмуасига алоқадор металлургия, машинасозлик, кимё ва самолётсозлик соҳаларидаги корхоналар, шунингдек, Россия ҳарбий-саноат комплекси билан ҳамкорлик қилувчи бир қанча конструкторлик бюролари ҳам тушган.
Улар орасида Ўзбекистоннинг учта компанияси: Mercury Renaissance, унинг шўба корхонаси бўлган Фарғона кимё заводи ҳамда Raw Materials Cellulose мавжуд.
Mercury Renaissance ва унинг шўба корхонаси Фарғона Кимё Заводи Муминов Рустам Раҳимжоновичга (60 фоиз) ҳамда Тожиев Шаҳриёр Сахиёровичга (40 фоиз) тегишли. Raw Materials Cellulose компаниясининг таъсисчилари сифатида Уткина Лариса Михайловна (76 фоиз) ва Бикова Лариса Рахимжонова (24 фоиз) рўйхатга олинган.
Raw Materials Cellulose компаниясининг асосий таъсисчиси Лариса Уткина Рустам Мўминов билан ҳамкорликда бизнес юритмоқда. Жумладан, ҳар иккала шахс Aloqa Klimkontrol ва Excellent Trans Services компанияларида улушлар эгасидир.
Шунингдек, Украина президенти бир вақтнинг ўзида Ўзбекистон ва Россия фуқаролигига эга эканлиги таъкидланаётган Рустам Мўминовга нисбатан шахсий санкциялар жорий этди.
