Бухоро нефтни қайта ишлаш заводида ишлаб чиқарилган AI-92 русумли 1 литр бензиннинг биржа савдоларидаги нархи 9400 сўмгача арзонлаштирилди, дея хабар берди «Ўзбекнефтгаз».

Компания қайд этишича, биржада бензиннинг 1 тоннаси бошланғич нархи биринчи босқичда 12 млн 881 минг сўмдан 12 млн 628 минг сўмга туширилган. Бу 1 литр AI-92 русумидаги автобензиннинг биржадаги бошланғич нархи 9 400 сўм дегани.

«Ўзбекнефтгаз ички бозорни ривожлантириш ва истеъмолчилар манфаатларини қўллаб-қувватлаш мақсадида юқори октанли ёқилғи нархларини босқичма-босқич пасайтириш ишларини давом эттиради», — дейилади компания хабарида.

Эслатиб ўтамиз, «Ўзбекнефтгаз» компанияси сентябрь ойидан AI-80 маркали бензин ишлаб чиқаришдан воз кечиши хабар қилинганди.

Масала тарихи

AI-80 бензинини ишлаб чиқаришни тўхтатиш режалари ҳақида камида 2020 йилдан бери айтилмоқда, бироқ расмийлар бу вазифани бажаришни доимо кечиктирган.

2024 йил бошида Энергетика вазирлиги AI-92 ва ундан юқори маркали бензин ишлаб чиқаришни кўпайтириш ҳисобига 2026 йилгача AI-80 бензинидан воз кечиш режалари ҳақида хабар берган эди. Шу билан бирга, юқори октанли бензин маркаларига акциз солиғи ставкаларини пасайтириш таклиф қилинди.

Кейинроқ президент бош вазирга 2025 йилдан бошлаб Аи-80 («Евро-2» стандарти) дан узил-кесил воз кечиш масаласини ҳал қилишни топширди.

Бироқ президентнинг сентябрдаги қарорида 2028 йилдан бошлаб «Евро-4» стандартидан паст бўлган мотор ёқилғисидан фойдаланиш ва сотишни босқичма-босқич чеклаш тўғрисида сўз борганди. Хусусан, бунинг учун Аи-80 ишлаб чиқарувчи Бухоро ва Фарғона нефтни қайта ишлаш заводлари чуқур модернизация қилинади ҳамда «Евро-2» ва «Евро-3» стандартларидаги ёқилғини импорт қилиш тақиқланади.

«Ўзбекнефтгаз» матбуот хизмати модернизация учун вақт керак бўлишини таъкидлаган. «Бухоро нефтни қайта ишлаш заводида „Евро-4“ ва ундан юқори бензинга ўтиш учун вақт керак. [2024 йил] охиригача лойиҳанинг техник-иқтисодий асослари ишлаб чиқилади, шундан сўнг у Вазирлар Маҳкамасига киритилади. Лойиҳани тўлиқ якунлаш учун 30−32 ой керак бўлади», — дейилади компания хабарида.

Президентнинг «Ўзбекистон-2030» стратегияси доирасида Атроф-муҳитни муҳофаза қилиш ва «яшил» иқтисодиётни ривожлантириш йили (2025 йил) давлат дастурини амалга ошириш тўғрисидаги фармони билан 2025 йил охиригача Аи-80 бензинидан фойдаланиш ва сотишни чеклаш учун «барча куч ва ресурсларни сафарбар қилиш» топширилди.