Ўзбекистонда маҳаллий ишлаб чиқарувчилар, расмий ва норасмий дилерлар автомобиллари нархларининг таҳлилини ўтказиш, сўнгра уларни мақбуллаштириш ва тартибга солиш бўйича таклифлар ишлаб чиқиш режалаштирилмоқда.

Бу ҳақда 2-центабр куни бош вазир ўринбосари Жамшид Хўжаев раислигида бўлиб ўтган Жаҳон савдо ташкилоти (ЖСТ) билан ишлаш бўйича идоралараро комиссия йиғилиши баённомасида айтилади.

Муҳокама якунлари бўйича Идоралараро комиссия қуйидаги қарорлар қабул қилди:

Шахсий фойдаланиш учун олиб кирилаётган ҳар бир автомобиль учун иккита кўрсаткични (электромагнит мослиги ва автомобиль салонидаги заҳарли моддалар даражаси) мажбурий синовдан ўтказиш талаби 2 сентябрдан бекор қилинди. «Ўзстандарт» агентлиги янги дилерлик марказлари пайдо бўлиши билан Пискент автосинов полигонида автомобилларни индивидуал синовдан ўтказиш зарурати йўқолганини маълум қилди.

Бундан ташқари, юридик шахслар учун автотранспорт воситаси турини тасдиқлашнинг амал қилиш муддати 3 йилдан 5 йилгача оширилади.

1 октябрга қадар «Ўзстандарт» агентлигига мувофиқликни баҳолаш марказларини ташкил этишга хусусий секторни жалб этиш ва аккредитация тизимини такомиллаштириш бўйича таклифлар киритиш топширилди.

Шу билан бирга, техник регламентларга ўзгартиришлар киритиш бўйича норматив-ҳуқуқий ҳужжат лойиҳаси тақдим этилади.

Истеъмолчилар ҳуқуқларини ҳимоя қилиш қўмитаси ва Иқтисодиёт вазирлиги маҳаллий ишлаб чиқарувчилар, расмий ва норасмий дилерлар автомобиллари нархлари фарқини таҳлил қилиб, сўнг уларни оптималлаштириш ва тартибга солиш бўйича Президент администрациясига таклифлар киритиши лозим.

Шунингдек, агентликка хориждан олиб келинаётган автотранспорт воситалари сифати назоратини кучайтириш, истеъмолчиларнинг мурожаатларига жавоб бериш вазифаси юклатилди.