Шавкат Мирзиёев Ўқитувчи ва мураббийлар куни арафасида соҳа ходимлари билан мулоқот ўтказмоқда. Таъкидланишича, охирги 8 йилда таълим ва илм-фанга харажатлар 6 карра оширилиб, 378 трлн сўм маблағ ажратилди. Олтин-валюта захиралари Ўзбекистон тарихида илк бор $50 млрдлик маррадан ошди.

2017 йилда 4 мингдан ортиқ маҳаллада бирорта ҳам боғча йўқ эди, қамров 27% дан ошмасди. Бугунги кунда боғчалар сони 38 мингдан, қамрови эса 78% дан ошди.

Яқинда таълим соҳасида эълон қилинган янги имтиёз ва имкониятлар ҳисобига боғча кириб бормаган бирорта маҳалла қолмаслиги, қамров ҳам 80% дан кам бўлмаслиги таъкидланди.

Боғчада тарбиячилар маоши мактаб ўқитувчиларига тенглаштирилди. Шу ойдан боғча мудиралари ҳам мактаб директори ўринбосари билан бир хил ойлик оладиган бўлди. Боғчадаги раҳбар ва педагоглар ойлиги қарийб 2 карра ошди.

Эндиликда хусусий боғчалардаги тарбиячилар ойлиги ва бола харажатининг бир қисми ҳам бюджетдан қоплаб бериладиган тизим жорий этилади.

Президент боғча тарбиячилари учун муҳим янгиликни айтди. Ҳозирда 7 мингдан ортиқ давлат боғчаларида 120 мингга яқин педагоглар бўлгани билан уларнинг атиги 34%и олий маълумотга эга. Лекин ҳозирда тарбиячиларнинг мактаб ўқитувчилари каби тоифа олиши учун олийгоҳ дипломи талаб этилади.

Шу сабабли олий маълумотли билан ўрта маълумотли тарбиячининг ойлигида фарқ бор. Шу боис, давлат ва хусусий боғча тарбиячиларини ишдан ажралмаган ҳолда олийгоҳларда ўқитиш йўлга қўйилиб, йилига 10 минг тарбиячи олий маълумотли қилинади.

Янги ўқув йилидан педагогика олийгоҳларида 1+5 бакалавр таълим шакли йўлга қўйилади. Бунда тарбиячилар 1 кун ўқиш ва 5 кун иш тамойилида таҳсил олади.

Шунингдек, худди Президент мактаблари каби ҳар бир вилоятда «Янги авлод» боғчалари ташкил қилиниб, уларда тарбиячилар илғор педагогик технологияларни ўрганади.