Жаҳонда олтин қазиб олиш бўйича тўртинчи ўринни эгаллайдиган ва Ўзбекистондаги энг йирик компания ҳисобланган Навоий кон-металлургия комбинати (НКМК) Халқаро молиявий ҳисобот стандартлари (ХМҲС) асосида тайёрланган 2025 йилнинг биринчи ярмидаги молиявий натижаларини эълон қилди.
Ҳисоботга кўра, компаниянинг соф фойдаси 1,51 млрд долларгача ошган, бу ўтган йилнинг шу даврига (882 млн доллар) нисбатан 71,8 фоизга кўп.
Даромад рекорд даражадаги 4,715 млрд долларга етди, бу ўтган йилга нисбатан 40,9 фоизга кўп. Ўсиш олтиннинг жаҳон нархлари юқорилиги билан изоҳланмоқда.
Олтин ишлаб чиқариш 1,54 млн унцияни (47,9 тонна) ташкил этди, бу ўтган йилга нисбатан 1,3 фоизга кўп (1,52 млн унция / 47,3 тонна). Тақдим этилган маълумотлар унция учун 3,113 доллар нархидан фойдаланган ҳолда ҳисоблаб чиқилган.
Компаниянинг асосий мижози аффилланган томон ҳисобланадиган Марказий банк бўлади. Биринчи олти ойда сотувлар 4,42 млрд долларни (3,3 млрд доллар эди) ташкил этди. Савдо ҳажмининг ўсиши, биринчи навбатда, Лондон қимматбаҳо металлар бозорида олтин нархининг кўтарилиши ва бироз сотиш ҳажмининг ошиши билан боғлиқ.
Операцион фойда 1,7 млрд доллардан 2,8 млрд долларга (+60,3 фоиз) ошди. Солиқ тўловлари қарийб 70 фоиз, яъни 716 млн доллардан 1,22 млрд долларгача ўсди.
Тузатилган EBITDA 51,7 фоизга ошиб, 3,06 млрд долларни ташкил этди. Олтин нархининг кўтарилиши ва юқори сотув ҳажми ўсиб бораётган харажатларни ортда қолдирди, бу эса маржанинг ўтган йилги 60,3% дан 64,9% гача ўсишига олиб келди.
AISC (ишлаб чиқариш ва техник хизмат кўрсатишнинг умумий нақд харажатлари / ишлаб чиқариш харажатлари) унция учун 907 доллардан 1164 долларгача (+28,3%) ошди. «Ўсиш кутилмаларга мос келди ва, биринчи навбатда, олтин нархи ва кон қазиш ҳажмининг ошиши туфайли роялти ўсгани билан боғлиқ», — деди компания.
Ҳисоботга кўра, тўланган роялти миқдори (фойдали қазилмаларни қазиб олиш солиғи) бир йил аввалги 344 млн долларга нисбатан 571 млн долларни ташкил этди (+66%). Конларни кенгайтириш ва янги конларни қидириш доирасида инвестициялар ҳажми 38,3 фоизга ошиб, 412 млн долларни ташкил этди.
