Марказий банк криптовалюталарни олтин-валюта захираларига киритиш ғоясини рад этди. Бу ҳақда регуляторнинг Халқаро резервларни бошқариш департаменти раҳбари Санжар Валиев маълум қилди, дея хабар бермоқда Spot.
«Мамлакат ривожлангани сари турли валюталар ва активлар, жумладан, криптовалюталар ҳам киритила бошланди. Лекин биз бунга ҳали тайёр эмасмиз: юқори волатиллик олтин-валюта захираларига салбий таъсир кўрсатиши мумкин. Криптовалюталарнинг спекулятив хусусияти туфайли уларни захираларга киритиш мақсадга мувофиқ эмас. Бошқа давлатлар тажрибасига қарайдиган бўлсак, улар турли инструментларни синовдан ўтказиб, захираларни етарлича диверсификация қилгандан кейингина бунга келишган», — деди у.
Санжар Валиевнинг таъкидлашича, Марказий банк криптовалюталар қийматининг кескин ўзгариши сабабли уларни олтин-валюта захираларига киритиш масаласига жуда эҳтиёткорлик билан ёндашиши керак, бу эса халқаро активлар барқарорлигини сақлаш мақсадига зиддир. Бошқа кўплаб регуляторлар ҳам криптоактивларни сотиб олишдан воз кечишга мойил, дея қўшимча қилди у.
Марказий банк департаменти раҳбари дунёда рақамли активларни эркин сотиб олиш ва сотиш имконини берадиган етарли ликвидлик ва иштирокчилар сонига эга тўлақонли криптовалюта бозори мавжуд эмаслигини таъкидлади.
«Ҳа, айтиш мумкинки, сўнгги пайтларда крипто бозори ишонч тарзда ўсиб бормоқда. Бироқ, бу захирага киритилган бошқа активлар билан таққослаб бўлмайдиган даражада. Бу мутлақо номутаносиб нарсалардир», — дея хулоса қилди Валиев.
Ўзбекистоннинг олтин-валюта захиралари август ойида янги тарихий рекордни ўрнатди. Халқаро активлар ҳажми $1,34 млрдга ошиб, $50 млрддан ошди. Марказий банк омборларидаги олтин қиймати ҳам биринчи марта $40 млрддан ошиб, кетма-кет иккинчи ой мутлақ максимум янгиланди. Бу қимматбаҳо металл нархининг ошиши ва олтин захирасининг кўпайиши ҳисобига кузатилди — 11,7 млн дан 11,8 млн троя унциясигача.
Шу билан бирга, валюта захиралари $49,3 млнга камайди. Уларнинг ҳажми центабр ойи бошида $9,5 млрддан паст бўлиб қолди. Қимматли қоғозлар (АҚШ ғазначилик облигациялари) қиймати $4,2 млнга ошиб, $1,016 млрдга етди.
