5 граммлик олтин қуйма нархи илк бор 8,8 млн сўмга етди
Жаҳон бозорида қимматбаҳо металлнинг троя унцияси нархи 4,4 минг долларга яқинлашмоқда.
17 октябрь куни ўлчовли олтин қуймаларнинг нархи янги рекорд кўрсаткичга етди. Бу ҳақда Марказий банк хабар берди.
1 грамм олтин 1 млн 760 минг 130 сўмга баҳоланмоқда. 5 граммлик ўлчовли қуйма 8 млн 801 минг сўмдан сотилмоқда.
Регулятор томонидан олтин қуймалари бўйича тақдим қилинган маълумотга кўра:
- 5 грамм ўлчовли олтин қуйма нархи 8 млн 801 минг сўм;
- 10 грамм олтин қуйма нархи 17 млн 601 минг сом;
- 20 грамм олтин қуйма нархи 35 млн 203 минг сўм;
- 50 грамм олтин қуйма нархи 88 млн 7 минг сўм;
- 100 грамм олтин қуйма нархи 176 млн 13 минг сўмни ташкил қилади.
Маҳаллий бозорда қимматбаҳо металл нархи йил бошидан буён 44 марта янги рекорд даражасига кўтарилди. Шу давр мобайнида унинг нархи 55,45%га ошди, бу эса йиллик ўсиш кўрсаткичидан ҳам юқори бўлди — 2024 йил октабридан бошлаб нархлар 55,06% га кўтарилган.
17 октябрь куни олтиннинг жаҳон котировкалари троя унцияси учун $4300 дан ошди. Хабар нашр қилинаётган вақтда олтиннинг глобал нархи 1 троя унцияси учун $4381,76ни ташкил қилди.
