Тошкент шаҳар ҳокими Шавкат Умурзоқов Ўзбекистон 24 телеканалига берган интервьюсида пойтахтда аҳоли томонидан жуда яхши ва ижобий қабул қилинган туристик ва гастрономик кўчаларни кўпайтириш учун қўшимча 1 трлн сўм маблағ ажратиш режалаштирилаётганини маълум қилди.

Дастлабки ҳисоб-китобларга кўра, қўшимча равишда 24 км ҳудудда кечаю кундуз ишлайдиган кўчалар ташкил этилади. Натижада 20−30 мингга яқин янги иш ўринлари яратилади.

«Тошкент шаҳрининг ҳокими сифатида тарихий фармон ва қарорлар имзоланди, деб ўйлайман. Президентнинг йўлимизни очиб берган имкониятларини қиймат сифатида баҳоласак, бутун Тошкент аҳолиси ҳис қиладиган лойиҳа бўлади. Бу 100 мингдан ортиқ иш ўрни яратиш имконини беради», — деди у.

Шу билан бирга, пойтахт ҳокими давлат раҳбари фармон ва қарорлар ижросини шахсан назоратга олганини қўшимча қилди.

2026 йилда маҳаллаларни ободонлаштириш, гастрономик кўчалар қуриш ва суғориш тизимларини янгилаш учун маҳаллий буджетдан 1 трлн сўм йўналтирилиши белгиланди.

2024 йилнинг февралида президент раислигида ўтказилган йиғилишда Тошкентнинг Миробод, Олмазор, Чилонзор, Учтепа, Шайхонтоҳур, Юнусобод, Яккасарой ва Яшнобод туманларида «гастрономик туризм» ва «ҳунармандлар» кўчаларини ташкил этиш топширилганди.

Бундан ташқари, пойтахт тажрибасини Тошкент вилоятида ҳам жорий этиш режалаштирилган. Хусусан, Миробод ҳокимлиги томонидан Паркент туманида Тарас Шевченко кўчасига ўхшаш лойиҳа ташкил этилади. Туман ҳокими Анвар Сайфутдиновнинг маълум қилишича, кўча ишга туширилгандан сўнг сайёҳлар оқими уч баробарга ошган.