Ўзбекистонда болаларга банк карталарини очишда муаммолар юзага келяптими?
Ижтимоий тармоқларда вояга етмаган шахсларга банк карталарини очишда ҳамда ушбу карталарни тижорат банклари ёки тўлов ташкилотларининг мобил иловаларига бириктиришда биометрик идентификациядан ўтиш билан боғлиқ муаммолар юзага келаётганлиги ҳақида хабарлар тарқалди.
Марказий банк бошқарувининг тегишли қарори билан 14 ёшдан – 18 ёшгача бўлган вояга етмаган шахслар банкларда ҳисобварақларни мустақил равишда очишларига рухсат берилганди. Банк карталари билан боғлиқ фирибгарликларнинг олдини олиш мақсадида Марказий банкнинг тегишли кўрсатмасига асосан банклар ва тўлов ташкилотлари мобил иловаларида «Янги рўйхатдан ўтиш», «Паролни қайта тиклаш» ҳамда «Аккаунтга бошқа қурилмадан кириш»да биометрик идентификациядан (Face-ID) ўтиш механизми жорий этилган.
Қайд этилишича, мазкур ҳолатдан келиб чиқиб, Марказий банк томонидан банклар ва тўлов ташкилотларига хатарларни бошқариш сиёсатига асосан, вояга етмаган шахслар учун мобил илова орқали электрон тўлов имкониятини тақдим этиш ҳамда юқори хатарли амалиётлар учун қўшимча идентификация механизмларини сақлаб қолиш имкониятларини яратиш юзасидан тегишли кўрсатма юборилган.
«Қисқа давр ичида вояга етмаган шахслар банклар ва тўлов ташкилотлари мобил иловалари орқали ўз банк карталаридан фойдаланиш имкониятига эга бўлишлари мумкинлиги маълум қилинади», дейилади Марказий банк хабарида.
Янги тартибга кўра, 14-18 ёшдаги вояга етмаган шахслар ўзлари мустақил, 14 ёшгача бўлганлар эса ота-онасидан бири ёки қонуний вакилининг ёзма розилиги асосида тижорат банкларида банк картасини очишлари мумкин.
