Россия Марказий банки Россия ва дўст мамлакатлар фуқаролари учун чет элларга пул ўтказиш бўйича мавжуд чекловларни бекор қилиш тўғрисида қарор қабул қилди. Бу ҳақда регулятор матбуот хизмати маълум қилди.

Ўзгаришлар 8 декабрь, душанба кунидан бошлаб кучга киради. Бу ҳол валюта бозоридаги қулай вазият билан боғлиқдир.

«Валюта бозоридаги барқарор вазиятни ҳисобга олган ҳолда, россияликлар ва дўст мамлакатларнинг норезидент жисмоний шахслари учун чет эл валютасини четга ўтказиш бўйича илгари ўрнатилган чекловларни бекор қилинади», — дейилади хабарда.

Шу билан бирга, 2025 йил 8 декабрдан 2026 йил 7 июнгача бўлган даврда бир қатор чекловлар амал қилишда давом этади:

• Россияда ишловчи дўстона бўлмаган мамлакатларнинг норезидент жисмоний шахслари фақат ўз иш ҳақи миқдоридаги маблағларни чет элга ўтказишлари мумкин бўлади;
• мамлакатда ишламайдиган дўстона бўлмаган мамлакатларнинг норезидент жисмоний шахсларига, шунингдек, бундай давлатларнинг юридик шахсларига маблағларни чет элга ўтказиш тақиқланади. Бу чеклов Россия юридик ва жисмоний шахслари назорати остидаги хорижий компанияларга нисбатан қўлланилмайди.

Марказий банк томонидан қайд этилишича, мазкур тақиқлар Россия молия бозорига сармоя киритаётган хорижий инвесторларнинг пул ўтказиш амалиётларига татбиқ этилмайди. Бу «Ин» турдаги ҳисобварақлардан чет элдаги ҳисобварақларга ўтказмалар ҳақида айтилмоқда.

Қўшимча қилинишича, «дўстона бўлмаган давлатлар банклари, агар тўловчи ва олувчининг ҳисобварақлари хорижий банкларда очилган бўлса, Россия кредит ташкилотларида очилган вакиллик ҳисобварақларидан фойдаланиб, рубль билан пул ўтказмаларини амалга ошириши мумкин».