Рақобат қўмитаси янги йил олдидан айрим тадбиркорлар истеъмолчиларни чалғитувчи ёлғон чегирмалар эълон қилаётганини маълум қилди.

Қўмита маълумотига кўра, жорий йил бошидан буён келган 48 мингдан ортиқ мурожаатнинг катта қисми айнан нотўғри ёки тўлиқ бўлмаган ахборот берилишига тегишли бўлган.

Бугунги кунда бозорда «янги йил чегирмаси», «бирини олинг — иккинчиси текинга», «50% чегирма», «фақат бугун» каби реклама баёнотлари фаол тарқалаётгани, аммо уларнинг барчаси амалда тасдиқланмаган ҳоллари учрамоқда.

Ҳукумат тасдиқлаган Чакана савдо қоидаларига кўра, сотувчилар чегирма қўллашда товарнинг охирги 30 кун ичидаги энг паст нархини қайд этиб, истеъмолчига тақдим этиши керак.

Шунингдек, чегирмани аниқ фоиз ёки сумма билан кўрсатиши, чегирмагача бўлган асл нархни очиқлаши, муддат ва шартларни олдиндан кўрсатиши ва чегирма қўлланадиган товарлар сони чекланган бўлса, бу ҳақида алоҳида хабар бериши шарт.

Агар чегирма рўйхатдан ўтишни ёки шахсий маълумот тақдим этишни талаб қилса, сотувчи маълумотларни қайта ишлаш қоидаларига қатъий риоя этиши лозим. Шунингдек, алкоголь, тамаки маҳсулотлари, дори воситалари, BAAQ (биологик фаол қўшимчалар) ва энергетик ичимликлар бўйича рағбатлантирувчи акцияларни ўтказиш тақиқланади.

Қўмита тадбиркорлардан қонунчилик талабларига қатъий амал қилишни сўради. Қоидабузарлик аниқланса, жавобгарлик ва молиявий жарималар қўлланади.