Бугун, 11 декабрь куни Марказий банк бошқарувининг йиғилиши бўлиб ўтди. Унда Марказий банк асосий ставкани 14 фоиз даражасида ўзгаришсиз қолдириш бўйича қарор қабул қилинди.

Қайд этилишича, инфляция пасайишда давом этмоқда: ноябрда умумий инфляция йиллик — 7,5 фоиз, базавий инфляция — 6,3 фоиз.

Шунингдек:

• 2025 йил якунига инфляция прогнози 7,3 фоизга пасайтирилди;
• 2026 йил инфляция прогнози 6,5 фоиз атрофида;
• Иқтисодий ўсиш юқори: йил якуни бўйича 7–7,5 фоиз кутилмоқда.

Таклиф омиллари бўйича хатарлар сақланмоқда (озиқ-овқат таклифи, транспорт нархлари ва тартибга солинадиган нархлар индексацияси).

Таъкидланишича, инфляция ва инфляцион кутилмалар пасайиши фонида реал фоиз ставкалари юқори бўлиб, миллий валютада жамғармалар ўсмоқда.

Молиявий инклюзивлик ошиши сабабли чакана кредитлаш юқори суръатда давом этмоқда ва бу келгусида инфляцион босимни кучайтириши мумкин.

Пул-кредит шароитлари инфляциянинг пасайиш траекториясига эришиш мақсадида қатъий даражада сақланади; заруратга қараб қайта кўриб чиқилиши мумкин.

Асосий ставкани навбатдаги кўриб чиқиш 2026 йил 28 январь кунига белгиланган.