Ўзбекистонда Бизнес ҳамроҳ лойиҳаси амалга оширилади. Бу ҳақда президентнинг тегишли қарори қабул қилинди.

Ҳужжатга кўра, 1000 дан ортиқ давлат ва хусусий хизматларни «ягона дарча» тамойили асосида кўрсатишни йўлга қўйиш орқали тадбиркорлар фаолиятига тўлақонли ҳамроҳлик қилиш тизими жорий этилади.

Тадбиркорлар масалалари ва муаммоларини эшитиш, муҳокама қилиш ва жойида ҳал қилишга мўлжалланган сифат жиҳатдан янги майдонча яратилади.

2026 йил 1 мартдан Бизнес ҳамроҳ лойиҳаси жорий этилиб, унинг доирасида марказлар йўлга қўйилади. Улар Савдо-саноат палатаси ҳузурида ташкил этиладиган МЧЖ томонидан бошқарилади. Дастлабки босқичда бу каби марказлар Тошкент ва Нукус шаҳарларида ҳамда вилоятлар марказларида биттадан ташкил этилади.

Келгуси йил мартдан республика ижро этувчи ҳокимият органлари раҳбарларининг тадбиркорлар билан мулоқотини ташкил қилишнинг тартиби жорий этилади. Бунда раҳбарлар ҳар чоракда тасдиқланадиган режа-графиклар асосида ҳудудларда тадбиркорлар билан Бизнес ҳамроҳ марказларида учрашади.

Режа-графиклар ҳар чоракда барча учун очиқ ҳолатда Бизнес ҳамроҳ электрон платформаси ва тегишли ташкилотларнинг расмий веб-сайтларида эълон қилинади.

Платформадаги «Раҳбарлар билан мулоқот» модули орқали бир чорак давомида 1 та ҳудуддан камида 10 нафар тадбиркорнинг мурожаати йўналтирилган ташкилот раҳбарлари кейинги чорак учун мўлжалланган режа-графигига ушбу ҳудуддаги тадбиркорлар билан учрашув ўтказишни киритади.

Учрашувларда кўтарилган ва марказнинг Cалл марказидан келиб тушган мурожаатлар платформа орқали «Тадбиркор виртуал офиси» ахборот порталига киритилади.

Бизнес ҳамроҳ марказлари зарур функционал имкониятларга эга бўлган давлат хизматлари марказлари биноларига тўғридан-тўғри жойлаштирилади.