Рақобат қўмитаси кўп шикоятларга сабаб бўлаётган хусусий таълим марказлари рўйхатини тузди. Бу ҳақда қўмита матбуот хизмати хабар берди.

2024−2025 йилларда нодавлат таълим хизматлари юзасидан 1,2 мингга яқин мурожаат қабул қилинган. Рақобат қўмитаси улар асосида тизимли мониторинг ва таҳлил ишлари олиб бормоқда.

Таъкидланишича, энг кўп шикоятлар қатор ўқув марказлари ва онлайн таълим платформалари фаолиятига тўғри келган.

Уларнинг асосий қисми қуйида келтирилган:

• Newton Academy, NewTone School;
• MyTeacher онлайн инглиз тили курси;
• Prep.uz онлайн рус тили курси;
• Badavlat ayol лойиҳаси;
• Qadam Education ўқув маркази;
• Lerna, Skillbox, GeekBrains;
• Interno Edu;
• Englify;
• Niyat Education;
• Sevenedu онлайн тил маркази.

Таҳлилларга кўра, айрим хусусий таълим хизматларида таълим сифати қониқарсизлиги, кўрсатилмаган хизматлар учун тўлов ундирилиши, шартнома шартлари ҳамда пулни қайтариш тартиби бўйича етарли маълумот берилмаслиги каби ҳолатлар аниқланган.

Шунингдек, Uzum Nasiya, Shaffof молия, Paylater ва бошқа муддатли тўлов платформалари орқали тузилган шартномаларни бекор қилишда қийинчиликлар юзага келаётгани, рекламада берилган ваъдалар амалда бажарилмаётгани бўйича ҳам эътирозлар билдирилган.

Рақобат қўмитаси хусусий таълим ташкилотларини қонунчилик, лицензия талаблари ҳамда истеъмолчилар ҳуқуқларини ҳимоя қилиш ва реклама тўғрисидаги қонунларга қатъий риоя этишга чақирди. Назорат органи ҳар қандай ҳуқуқбузарлик учун қонунчиликда жавобгарлик белгиланганини эслатиб ўтган.

Истеъмолчиларга хусусий таълим хизматларидан фойдаланишда лицензия ва рухсатномаларни олдиндан текшириш, шартнома шартларини, айниқса тўлов ва пулни қайтариш тартибини диққат билан ўрганиш, онлайн шартномаларни имзолаш ва тўлов қилишга шошмаслик тавсия этилмоқда.

Бундан ташқари, очиқ манбалардаги фойдаланувчи фикрлари билан танишиш, имкон бўлса, синов дарсларида иштирок этиш ва офлайн дарслар ўтказиладиган жойни кўздан кечириш тавсия қилинди.