Ўзбекистонликларга АҚШ компанияларига инвестиция қилишга рухсат берилади
1 январдан Ўзбекистон фуқаролари ва корхоналарига АҚШда рўйхатга олинган компанияларга инвестиция киритиш учун ҳукумат рухсати талаб этилмайди.
2026 йил 1 январдан Ўзбекистон резидентлари учун АҚШда рўйхатга олинган компанияларга инвестиция киритишда ҳукумат рухсатини олиш талаби бекор қилинмоқда. Марказий банк 16 декабрь куни капитал ҳаракати билан боғлиқ айрим валюта операцияларини амалга ошириш тартибига ўзгартиришлар киритди.
Бу президентнинг 11 ноябрдаги «Америка-Ўзбекистон ишбилармонлик ва инвестиция кенгашини ташкил этиш тўғрисида»ги фармонида белгиланганди.
1 январдан бошлаб Ўзбекистон фуқаролари ва корхоналари АҚШ компанияларига ҳукумат рухсатисиз ва пул маблағлари уларнинг Ўзбекистон банкларидаги ҳисобварақларида бўлган тақдирда, чегараланмаган миқдорда эркин инвестиция киритишлари мумкин бўлади.
Ўзбекистон резидентлари қуйидаги имкониятларга эга бўлади:
- компания ташкил этиш (устав капиталини шакллантириш), Америка компаниясидаги улуш ёки акцияларни сотиб олиш учун АҚШга пул ўтказиш;
- маблағларни АҚШдаги ўз филиалларининг айланма капиталини тўлдиришга йўналтириш;
- буни исталган миқдорда, ҳисобварақлардаги ўз маблағларидан келиб чиқиб амалга ошириш.
Шундай қилиб, АҚШдаги инвестиция фаолияти энди ҳукуматнинг алоҳида рухсатини талаб қилмайди. Илгари 10 минг доллардан ортиқ бўлган битимлар учун рухсатнома талаб қилинарди.
Шу билан бирга, бошқа мамлакатлардаги инвестициялар ва капитал ҳаракати билан боғлиқ операциялар учун амалдаги чекловлар сақланиб қолади. Енгилликлар фақат АҚШга тааллуқли.
«Валютани тартибга солиш тўғрисида»ги қонунга ҳозирча ўзгартиришлар киритилмаган.
