АҚШ президенти Дональд Трамп Green Card лотереяси дастурини вақтинча тўхтатди, бунга Браун университети ва MIT (Массачусетс технология институти)даги отишмаларда гумонланувчининг Қўшма Штатларга айни шу дастур орқали кириб келгани сабаб қилиб кўрсатилмоқда.

Ички хавфсизлик вазири Кристи Ноэм X`даги постида Трампнинг кўрсатмасига биноан АҚШ Фуқаролик ва иммиграция хизматларига (USCIS) ушбу дастурни тўхтатиб туришни буюраётганини маълум қилди.

«Браун университетидаги отишмада айбланган Клаудио Мануэль Невеш Валенте АҚШга 2017 йилда виза лотереяси (DV1) орқали кириб келган ва унга грин-карта берилган. Бундай жирканч кимсанинг мамлакатимизга киришига ҳеч қачон йўл қўйилмаслиги керак эди», — деб ёзди у.

«2017 йилда ҳам президент Трамп ушбу дастурни тугатиш учун курашган эди. Ўшанда Нью Йоркда ИШИД террорчиси юк машинасида одамларни босиб кетган, оқибатда саккиз киши ҳалок бўлганди. Ўша террорчи ҳам АҚШга айнан DV1 дастури орқали кирган эди», — дейди Ноэм.

«Президент Трампнинг топшириғига биноан, мен ушбу ҳалокатли дастур туфайли бошқа америкаликларга зарар етмаслигини таъминлаш учун АҚШ Фуқаролик ва иммиграция хизматларига (USCIS) DV1 дастурини зудлик билан тўхтатишни буюрмоқдаман», — деб таъкидлади вазир.

Португалиялик 48 ёшли Клаудио Мануэль Невеш Валенте, расмийларга кўра, пайшанба куни кечқурун ўз жонига қасд қилиш аломатлари билан ўлик ҳолда топилган.

2025 йилги виза лотереяси учун қарийб 20 миллион киши ҳужжат топширган бўлиб, ғолибларнинг турмуш ўртоқлари билан ҳисоблаганда 131 000 дан ортиқ номзод танлаб олинган. Танловда ғолиб чиққандан сўнг, улар АҚШга кириш учун рухсат олиш мақсадида текширувдан ўтишлари шарт.

Associated Press`нинг эслатишича, 2025 йилда дастурда Португалия фуқаролари бор-йўғи 38 та ўринни қўлга киритган. 38 та ўрин 55 000 та виза квотасининг тахминан 0,069 фоизини ташкил қилади.