Марказий банкнинг Банк назорати қўмитаси ноябрь ойидаги йиғилишларда 41 та масалани кўриб чиқиб, тегишли қарорлар қабул қилди. Бу ҳақда регулятор матбуот хизмати хабар берди.

Хусусан, рўйхатга олиш ва рухсат бериш йўналишида 31 та масала кўриб чиқилди. Улар орасида кредит ташкилотлари уставига ўзгартиришларни рўйхатдан ўтказиш, янги микромолия ва кредит ташкилотларини рўйхатга олиш ҳамда айримларини реэстрдан чиқариш ҳамда устав фондидаги улушга эгалик қилиш учун рухсат бериш масалалари бор.

Бундан ташқари, банкларда аудиторлик текширувларини ўтказиш ҳуқуқи учун сертификат бериш ва банклар кузатув кенгаши, бошқаруви ҳамда муҳим ходимлари номзодларини кўриб чиқиш ишлари амалга оширилди.

Шунингдек, кредит ташкилотларининг молиявий ҳолатига оид жами 10 та масала кўриб чиқилди. Унда Марказий банк кўрсатмалари ва пруденциал меъёрлари бажарилиши, банклар ҳамда микромолия ташкилотларида ўтказилган инспекция натижалари ва банк хизматлари истеъмолчиларининг ҳуқуқларини ҳимоя қилиш масалалари муҳокама қилинди.

Жиноят даромадларини легаллаштириш, терроризмни молиялаштириш ва оммавий қирғин қуролини тарқатишни молиялаштиришга қарши курашишга қаратилган масалалар ҳам кўриб чиқилди.

Марказий банк ўтган ойда қоидабузарликлар учун 4 та банкка нисбатан жарима санкциясини қўллади.

Улар регулятор талаблари ва ўтказилган инспекция текширувлари, жиноий даромадларни легаллаштириш, терроризм ва оммавий қирғин қуролини тарқатишни молиялаштиришга қарши курашиш қоидаларига амал қилмаган.

Бундан ташқари, пруденциал талаблар бузилиши, ўз фаолиятини қонунчилик талабларига мувофиқлаштирмаганлиги ҳамда инспекция текширувларида аниқланган камчиликлар учун 1 та микромолия ва 1 та тўлов ташкилотлари чора ва санкциялар қўлланилиши тўғрисида огоҳлантирилди.