Жисмоний шахслар учун микроқарз ва истеъмол кредитларини олиш мумкин бўлган максимал миқдорлар белгиланди. Бу ҳақдаги Марказий банк қарори давлат рўйхатидан ўтказилди.

Унга кўра, банкларга ўрнатиладиган макропруденциал нормативларга қарз олувчининг истеъмол кредитлари ва микроқарзлари бўйича қарзнинг даромадга нисбати кўрсаткичини ҳисоблаш талаби қўшилди.

2026 йил 1 мартдан бошлаб, агар қарз олувчининг (биргаликда қарз олувчининг) ўртача ойлик даромадини аниқлаш имконияти мавжуд бўлса, қарз миқдори даромаднинг 8 бараваридан, аниқлаш имкони бўлмаса — 5 бараваридан ошмаслиги керак.

Масалан, қарз олувчининг ўртача ойлик даромади 5 млн сўмни ташкил этса, у даромадининг 8 баравари — 40 млн сўмдан ортиқ миқдорда истеъмол кредити ёки микроқарз ололмайди.

Бу талаб якка тартибдаги тадбиркорларга бериладиган кредитлар ва таълим кредитларига нисбатан татбиқ этилмайди. Қарор 2026 йилнинг 21 январидан кучга киради.

Марказий банк август ойида банклар 1,1 млн ҳолатда керагидан ортиқ даражада микроқарз ажратганини билдирган эди. Регуляторнинг қайд этишича, жорий йилнинг уч ойида фуқароларга кўрсатилганидан кўп миқдорда кредит ажратилган. Бундай агрессив кредитлаш аҳолига молиявий муаммоларни келтириб чиқармоқда.

Октабр ойида банкларга аҳолига кредит ажратишда янги талаблар белгиланди. Эндиликда банклар мижозларга таваккалчиликлар бўйича чеклист беради, олдиндан розилик белгиларини ўрнатмайди, кредитни нафақа ва ёрдам пулларидан ундирмайди ҳамда тўлов жадвалига қатъий амал қилади.