2026 йилда юридик шахсларнинг мол-мулк солиғи бўйича қандай ўзгаришлар амалга оширилади?
Юридик шахслардан олинадиган мол-мулк солиғини ҳисоблаш учун солиқ базаси кўчмас мулкнинг 1 метр квадрат учун мутлақ миқдорда белгиланган минимал қийматдан паст бўлиши мумкин эмас.
Мол-мулк солиғи ҳисоботи проактив тартибга ўзгарди
Солиқ ҳисоботи солиқ органларида мавжуд ҳамда солиқ тўловчининг шахсий кабинетидаги интерактив хизматга киритган маълумотлари асосида автоматик шакллантирилади ва солиқ тўловчи томонидан 5 кун ичида (ҳисоботни тақдим этиш муддатидан кечиктирмай) тузатишлар киритилган ҳолда тақдим этилади.
Солиқ ҳисоботига тузатишлар киритилмаганлиги солиқ тўловчининг солиқ органлари томонидан шакллантирилган ҳисоботга рози эканлигини билдиради ва ҳисобот тақдим этилган деб ҳисобланади.
Юридик шахслар учун асосий солиқ ставкаси 1,5% миқдорида сақланиб қолган бўлса, Солиқ кодексининг 415-моддаси 3-қисмидаги объектлар учун ставка 0,65% дан 0,7% га оширилди.
Юридик шахслардан олинадиган мол-мулк солиғини ҳисоблаш учун солиқ базаси кўчмас мулкнинг 1 м² учун мутлақ миқдорда белгиланган минимал қийматдан паст бўлиши мумкин эмас:
- Тошкент шаҳрида — 3 млн 530 минг сўм;
- Нукус шаҳри ва вилоят марказларида — 2 млн 350 минг сўм;
- Бошқа шаҳарларда ва қишлоқ жойларида — 1 млн 390 минг сўм.
2026 йилда юридик шахсларнинг мол-мулкига солинадиган солиқ бўйича бўнак тўловлари тўғрисидаги маълумотнома шакллари
Бўнак тўловлар тўғрисидаги маълумотнома шаклини солиқ тўловчилар жорий солиқ даврининг 20 январидан кечиктирмай кўчмас мулк жойлашган ердаги солиқ органларига тақдим этади.
2026 йил учун юридик шахсларнинг мол-мулкига солинадиган солиқ бўйича бўнак тўловлари тўғрисидаги маълумотнома шакллари мй.солиқ.уз порталига жойлаштирилган:
- AOS тўловчилар учун – 10401_33;
- AOS тўловчи ҳисобланмайдиган солиқ тўловчилар учун – 10401_34.
Ўзбекистон Республикаси норезидентлари бўлган юридик шахслар бўнак тўловлари тўғрисидаги маълумотнома шаклларини тақдим этишлари талаб этилмайди
Юридик шахслардан олинадиган мол-мулк солиғи бўйича бўнак тўловларининг тўлаш муддатлари:
- AOS тўловчилар учун – йиллик солиқ суммасининг 1/4 қисми миқдорида ҳар чорак 3-ойининг 20-кунидан кечиктирмай;
- AOS тўловчи ҳисобланмайдиганлар учун – йиллик солиқ суммасининг 1/12 қисми миқдорида ҳар ойнинг 10-кунидан кечиктирмай.
Бунда январь ойи учун 20 январдан кечиктирмай.
