2026 йилда Ўзбекистонда хизматлар бозори ҳажми 100 млрд доллардан ошади. Бу ҳақда Ўзбекистон президенти Шавкат Мирзиёев 26 декабрь куни парламент ва халққа йўллаган мурожаатномасида маълум қилди.

Давлат раҳбари қайд этишича, жорий йилнинг ўзида хизматлар ҳажми қарийб 15 фоизга ўсиб, 82 миллиард долларга етди. Хизматларга бўлган талабни рағбатлантириш учун 2026 йилда соҳага 85 триллион сўм кредит, 9 триллион сўм субсидия ажратилади. Хусусан, таълим хизматлари учун бюджетдан 7 триллион сўм берилади.

Президент кейинги беш йилда хорижий туристлар сонини 2 карра (11 миллиондан 20 миллионгача) ошириш, туризм хизматлари ҳажмини эса 20 миллиард долларга етказиш вазифасини қўйди.

Шу мақсадда туризм инфратузилмасини ривожлантиришга алоҳида эътибор қаратилади. Хусусан, Самарқандда Бибихоним, Регистон мажмуалари, Амир Темур мақбараси, Улуғбек расадхонаси, Шоҳи Зинда ва Афросиёб музейини бир-бири билан боғлайдиган замонавий йўлак ва кўприклар барпо этилади.

Шаҳрисабзда Ғелон йирик туристик мажмуасининг биринчи босқичи ишга туширилади. Поп туманида Арашан тоғ дам олиш туристик зонаси ташкил этилади. Хивадаги Ичанқалъа иммерсив, яъни жонли ва «ақлли» музей-шаҳарга айлантирилади.

Шунингдек, Хоразм ва Қорақалпоғистондаги археологик ёдгорликлар бўйлаб йирик туризм ҳалқасини ташкил этиш режалаштирилмоқда.

2026 йилда тадбиркорлар томонидан 4 миллиард долларлик 3,5 мингдан зиёд янги сервис объектлари ишга туширилади. Туризм масканларини ташкил қилиш учун келгуси уч йилда 5 минг гектар ер аукционга чиқарилади.

Бундан ташқари, 2026 йилдан «Ўзбекистон мероси меҳмонхоналари» дастури бошланади. Унинг доирасида Маданий мерос объектларида хусусий шериклик асосида «бутик меҳмонхона» ташкил қилиш учун нуфузли меҳмонхона тармоқлари олиб келинади. Дастур иштирокчиларига ер, мулк, фойда солиқлари ва божхона тўловидан имтиёз берилади.

«Мана шу ишлар ҳисобига 2026 йилда хизматлар бозори 100 миллиард доллардан оширилади», — деди президент.

Туристлар оқими тобора ошаётгани авиация ва темир йўлда йўловчи ташиш қувватини 2 баробар кўпайтиришни тақозо этмоқда. Шу боис, 2026 йилда авиапаркдаги ҳаво кемаларининг сони 120 тага етказилади.

Маҳаллий авиақатновларни ошириш учун субсидиялашнинг янги тизими жорий этилади. Энди нархидан қатъи назар, сотилган ҳар бир чипта учун аниқ миқдорда субсидия ажратилади. Бу чипта нархини пасайтириш ва талабни оширишга хизмат қилади.