Ўзбекистонда ўз-ўзига кредит беришни тақиқлаган аҳоли сони қарийб 440 минг нафарга етди. Бу ҳақда Кредит-ахборот таҳлилий маркази (КАТМ) кредит бюроси матбуот хизмати маълум қилди.

2026 йилнинг 1 январь ҳолатига кўра, мамлакатда «Кредитга тақиқ» хизматига уланган жисмоний шахслар 438 322 нафарни ташкил этди. Гендер кўрсаткичи бўйича уларнинг асосий қисми — 67% ини (292 722) эркаклар ташкил этади, қолган 145,6 минг нафари эса аёллардир.

Ёш кесимида ўз-ўзига кредит битимини тузишга тақиқ қўйишдан энг кўп 26−35 ёшдаги фуқаролар фойдаланади — улар барча фойдаланувчиларнинг 33%ини ташкил қилади.

Кейинги ўринларда 36−45 ёшдагилар (24%) ҳамда 26 ёшгача бўлганлар (22%) турибди. Шу билан бирга, 46−55 ёш оралиғидагилар 12% га, 56 ёшдан юқори аҳоли сони эса атиги 9% га тўғри келади.

«Кредитга тақиқ» хизматига уланганлар сони ойлар кесимида ўсиб бормоқда. Хизмат июнь ойида ишга туширилгач, ундан 33,13 минг нафар фуқаро фойдаланган бўлса, июлда бу — 37,65 минг, августда — 37,88 минг, центабрда — 40,8 минг, октабрда — 41,86 минг, ноябрда — 93,43 мингни ташкил этган. Декабрь ойи келиб эса ушбу кўрсаткич кескин ошди — 153 565.