Ҳукумат қарори билан «Олий таълим ташкилотлари талабаларининг буюртмачилар билан ҳамкорлигини ташкил этиш тартиби тўғрисида»ги низом тасдиқланди. Бу ҳақда Адлия вазирлиги хабар қилди.

Қайд этилишича, низом бакалавриат йўналишида 2- ва ундан юқори курсда ўқиётган талабаларнинг ўқиши учун шартнома тўловларини иш берувчилар томонидан қоплаб бериш ҳамда уларнинг таълими якунлангач ишга қабул қилиш тартибини белгилайди.

ОТМлар ҳамда талабалар ўртасида 3 томонлама шартномалар тузишда ишчилар сони 50 нафардан ортиқ ёки қиймати камида 1 миллион доллар бўлган инвестиция лойиҳаларига эга вазирлик, идора ҳамда ташкилотлар буюртмачи сифатида иштирок этиши мумкин.

Талабалар ҳар йили 20 сентябргача саралашда иштирок этиш учун олий таълим ташкилотига электрон ариза топширади ва ўзлаштириш кўрсаткичлари тўғрисидаги маълумотномани илова қилади. Улар ўқишни битирганидан сўнг буюртмачи корхона ёки ташкилотда ишлаб бериш шарти билан ариза топширади.

Ариза топшириш ва саралаб олишда иштирок этувчи талабгорларнинг жорий ўқув йилида ўзлаштириш GPA кўрсаткичи 3 ва ундан юқори бўлиши лозим. Танлов комиссияси ҳар йили 15 октябргача талабгорларни суҳбат асосида саралаб олади.

Талабгорларни саралаб олишда буюртмачи вакили хулосаси асосий мезон ҳисобланади. Уч томонлама шартнома тузган ва таълимни муваффақиятли тамомлаган талабалар ўқишини битирганидан кейин буюртмачи томонидан белгиланган тартибда ишга қабул қилинади.