“Олий таълим ташкилотлари битирувчиларини иш билан таъминлашда  буюртмачилар иштирокини янада кенгайтириш чора-тадбирлари тўғрисида”ги Вазирлар Маҳкамасининг 8-сон қарори қабул қилинди.

Қуйидаги тартибларни белгиловчи Олий таълим ташкилотлари талабаларининг буюртмачилар билан ўзаро ҳамкорлигини ташкил этиш тартиби тўғрисидаги низом тасдиқланди:

• кадрлар тайёрлаш йўналишлари бўйича вазирлик, идора ва ташкилотларнинг буюртмаларига мувофиқ иккинчи ва ундан юқори курс талабалари орасидан муносиб номзодларни танлаб олиш;
• иш берувчи, олий таълим муассасаси ва талаба ўртасида талаба ўқишни тугатгандан сўнг ишга жойлашиши шарти билан унинг контракт тўловини иш берувчи томонидан қопланишини назарда тутувчи уч томонлама келишув тузилиши;
• иш берувчининг талабларига мувофиқ асосий фанларга қўшимча равишда танлов фанлари сифатида қўшимча таълим модулларини жорий этиш ва ушбу фанлар бўйича талабага кредит балларини қўйиш;
• семестр якунида иш берувчининг талабанинг ўрганилаётган фанларни ўзлаштириши устидан назорати;
• иш берувчининг таклифлари асосида талабанинг диплом иши мавзусини унинг фаолияти ёки инвестиция лойиҳалари билан боғлиқ масалаларни ҳисобга олган ҳолда белгилаш;
• уч томонлама келишув асосида ўқиётган битирувчиларни иш берувчи томонидан кафолатланган иш билан таъминлаш шарти билан ишга қабул қилиш.

Уч томонлама шартномаларни тузишда буюртмачи сифатида қиймати 1 млн АҚШ долларидан кам бўлмаган инвестиция лойиҳаларига эга бўлган ёки ходимларининг сони 50 нафардан ортиқ бўлган вазирликлар, идоралар ва ташкилотлар иштирок этиши мумкин.

Талабалар ҳар йили 20 сентябрга қадар ўқишни тугатгандан сўнг буюртмачи корхона ёки ташкилотда ишлаб бериш шарти билан танловда иштирок этиш учун электрон ариза топширади.

Бунда ўзлаштириш кўрсаткичлари тўғрисидаги маълумотнома илова қилинади. Талабгорлардан жорий ўқув йилида GPA кўрсаткичи 3 ва ундан юқори даражада бўлиши талаб этилади.

Танлов комиссияси ҳар йили 15 октябрга қадар ОТМда суҳбат асосида талабгорларни танлаб олади.

Ҳужжат Қонун ҳужжатлари маълумотлари миллий базасида эълон қилинган ва 2026 йил 12 январдан кучга кирди.