Марказий банк 2025 йил декабрь ойида 10 та банк ва 1 та микромолия ташкилотига нисбатан жарима санкцияси қўллади. Бу ҳақда банк матбуот хизмати хабар қилди.

Қайд этилишича, Банк назорати қўмитаси томонидан шу ойдаги йиғилишларда 45 та масала кўриб чиқилди. Рўйхатга олиш ва рухсат бериш йўналишида кўрилган 5 та кредит ташкилотлари уставига киритилган ўзгартиришларни рўйхатдан ўтказиш, 4 та янги очилаётган микромолия ва кредит ташкилотларини ҳисоб рўйхатидан ўтказиш, 4 та кредит ташкилотларининг устав фондидаги улушига эгалик қилиш учун рухсат бериш кабилар шулар жумласидан.

Пруденциал норматив талабларига риоя этилмаганлиги, фаолиятини қонунчилик талабларига мувофиқлаштирмаганлиги ҳамда инспекция текширувлари давомида аниқланган камчиликлар учун 10 та банк, 1 та тўлов ташкилоти ва 1 та тўлов операторига нисбатан таъсир чоралари ва санкциялар қўлланилиши тўғрисида огоҳлантириш берилди.

Шу билан бирга, банк талаблари, ўтказилган инспекция текширувлари ҳамда жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш қоидаларига риоя этмаганлиги учун 10 та банк ва 1 та микромолия ташкилотига нисбатан жарима санкцияси қўлланилди.

Ўтган йилнинг август ойида ҳам шу сабаблар билан 9 та банк, 6 та микромолия ташкилоти ва 4 та ломбардга нисбатан жарима санкцияси тайинланганди.

Унда Устав капиталининг энг кам миқдорини шакллантирилиши бўйича қонунчилик талабларига риоя қилинмаганлиги учун 1 та банкка берилган лицензия чақириб олинган.