Енгил саноат соҳаси корхоналари молиявий соғломлаштирилади. Бу ҳақда президентнинг тегишли фармони қабул қилинди.

Ҳужжатга кўра, тўқимачилик корхоналарини иқтисодий ва молиявий кўрсаткичларидан келиб чиққан ҳолда «яшил», «сариқ» ва «қизил» тоифаларга ажратилади. Уларнинг фаолиятига манзилли кўмаклашиш бўйича корхоналарни қўллаб-қувватлаш дастури амалга оширилади.

Бунда корхоналарга банклар томонидан $2 млнгача кредитлар ажратишга рухсат берилади. Ушбу кредитлар Енгил саноатни ривожлантириш агентлиги ресурслари ҳисобидан, харид қилинган ва тўловлари тўлиқ амалга оширилган ёки корхонанинг ўзи етиштирган хомашё гарови асосида тақдим этилади.

Соғломлаштириш имконияти мавжуд деб топилган корхоналарнинг аввал олган тижорат кредитлари муддати 7 йилгача узайтириб берилади.

Пахта хомашёси хариди учун жалб қилинган кредитлар бўйича 2026−2027 йилларда тўлов графикларида январь февраль ойлари учун белгиланган тўловларни кредит шартномасига асосан охирги 6 ойга тенг тақсимланган ҳолда тўлаши мумкин.

Фармонга кўра, 2026 йилдан енгил саноат корхоналарида қуввати 5 МВтгача бўлган қайта тикланувчи манбаларда ишлаб чиқарилган ортиқча электр энергиясини сотишга рухсат берилади.

Жорий йилдан 2027 йил охиригача пахта тайёрлаш пунктларига мол-мулк ва ер солиқларини 50%га камайтирилган ставкада тўлашга рухсат берилади.

2026 йил 1 январдан 2029 йил 1 январгача банклар балансидаги тўқимачилик ва тикув-трикотаж корхоналарининг мол-мулклари инвесторларга реализация қилишда ҚҚСдан озод қилинади.

Банклар балансидаги тўқимачилик ва тикув-трикотаж корхоналари мол-мулкларини харид қилган инвесторларга, ишлаб чиқаришни 6 ойда тўлиқ тиклаш шарти билан, 1 йил давомида мол-мулк солиғини 50% камайтирилган ставкада тўлашга рухсат берилади.

Чарм-пойабзал, мўйначилик корхоналари ҳамда терини қайта ишловчи ташкилотлар учун фойда, мол-мулк, ер ва айланма солиқлар бўйича имтиёзлар муддати узайтирилади.