Шавкат Мирзиёев 20 январь куни рақамли технологияларни ривожлантириш соҳасида эришилган натижалар ҳамда 2026 йилга мўлжалланган устувор вазифаларга бағишланган тақдимот билан танишди. Тақдимотда электрон давлат хизматларини янада ривожлантириш режалари кўриб чиқилди. Рақамли хизматлар сонини 900 тагача етказиш, MyGov.uz мобил иловасининг функционалини кенгайтириш кўзда тутилган.

Хусусан, 50 тадан ортиқ хизматларда сунъий интеллект технологияларини жорий этиш, Аҳолининг ягона реестрини ишлаб чиқиш, тадбиркорлик субъектини очиш, якка тартибдаги тадбиркорлик ходимларини ҳисобга қўйиш, банк пластик картасини очиш, сим-карта олиш, суғурта ва реклама хизматларини рақамлаштириш режалаштирилган.

Тақдимотда сунъий интеллект технологиялари учун инфратузилма яратиш ишларининг бориши ҳақида ахборот берилди.

Ҳозирги кунда кичик супер компьютер ишга туширилди, катта супер компьютерни харид қилиш ва ишга тушириш ишлари фаол босқичда бораётгани қайд этилди.

Лойиҳа натижасида 15 та олий таълим муассасасида сунъий интеллект лабораториялари ташкил этилади, соҳадаги мутахассисларнинг салоҳияти ошади ҳамда маҳаллий СИ ечимларини яратиш ва жорий этиш имкониятлари яратилади.

Ўзбекистон ҳудудларида дата-марказлар тармоғини кенгайтириш, маълумотлар хавфсизлиги ва узлуксизлигини таъминлаш зарурлиги қайд этилди.

Телекоммуникация инфратузилмасини ривожлантириш масалаларига эътибор қаратилди. Бу борада барқарор ўсишга эришилаётгани, интернет тезлиги ва қамрови йилдан йилга ошиб, мобил алоқа хизматларининг сифати яхшилангани таъкидланди.

2026 йилда 5Г технологияларини жорий этиш ва аҳоли пунктларини юқори тезликдаги интернет билан қамраб олишни давом эттириш, шунингдек, сунъий йўлдош алоқасидан фойдаланишни кенгайтириш режалаштирилган.

Президент рақамли технологиялар иқтисодиёт тармоқлари рақобатбардошлигини ошириш, давлат бошқарувини яхшилаш ва аҳоли ҳаёти сифатига бевосита таъсир кўрсатишини таъкидлаб, белгиланган вазифаларни амалга ошириш бўйича мутасаддиларга тегишли топшириқлар берди.