Солиқ қўмитасида марказий аппарат ва ҳудудий солиқ идоралари, тизим таркибидаги ташкилотлар раҳбарлари иштирокида кенгайтирилган Ҳайъат йиғилиши бўлиб ўтди.

Танқидий таҳлил тарзида ўтган йиғилишда давлат солиқ хизмати органларининг 2025 йилдаги фаолияти натижалари сарҳисоб қилиниб, 2026 йилда амалга оширилиши лозим бўлган вазифалар белгилаб олинди.

«Йиғилиш солиқ маъмурчилигини таъминлаш, яширин иқтисодиёт улушини қисқартириш мақсадида қабул қилинган қонунлар, фармон ва қарорлар билан 2026 йилда солиқ қонунчилигига 110 дан ортиқ қўшимча ва ўзгартиришлар киритилганлиги алоҳида таъкидланди. Мазкур меъёрий ҳужжатларда солиқ органларига юклатилган кечиктириб бўлмайдиган вазифалар ижросини сўзсиз ташкил этиш, рақамлаштириш йўналишида амалга оширилиши лозим бўлган аниқ чора-тадбирлар белгилаб олинди», — дейилади хабарда.

Шунингдек, жорий йилда яширин иқтисодиётни қисқартириш бўйича масъулларга манзилли топшириқлар берилди. Ҳайъат йиғилишида, қўмита раиси ўринбосарлари, ҳудудий бошқарма ва туман (шаҳар) раҳбарларининг ҳисоботлари эшитилди.

Муҳокамалар натижасида зиммасига юклатилган хизмат вазифаларини етарли даражада бажармаган, иш фаолиятида хато ва камчиликларга йўл қўйган 53 нафар масъул ходимларга интизомий чоралар қўлланилиб, 7 нафар ҳудудий солиқ инспекция раҳбарлари, 1 нафар солиқ бошқармаси бошлиғи ўринбосари ҳамда 1 нафар солиқ бошқармаси бўлим бошлиғи вазифасидан озод этилди.

Йиғилиш сўнгида, солиқ тушумлари бўйича жорий йилнинг I чораги учун прогноз кўрсаткичларини барча солиқ турлари бўйича сифатли равишда сўзсиз таъминлаш, қонун ҳужжатлари асосида солиқ маъмурчилигига киритилган янгиликларни солиқ тўловчиларга ўз вақтида ва сифатли етказилишини таъминлаш борасида маъсулларга тегишли топшириқлар берилди.