Олтин нархи илк бор бир унцияси учун 5 минг доллардан ошди. Қимматбаҳо металл 2025 йилда 60 фоиздан кўпроққа қимматлашганди ва бу тарихий ўсиш жараёни давом этмоқда. Бу ҳақда ББC хабар берди.

Бу ҳолат АҚШ ва НАТО ўртасида Гренландия масаласи бўйича таранглик кучайгани, шунингдек, молиявий ва геосиёсий беқарорликка оид хавотирлар ортиб бораётгани фонида юз бермоқда. АҚШ президенти Доналд Трампнинг савдо сиёсати ҳам бозорларни ташвишга солмоқда. У 24 январь куни Канада Хитой билан савдо битими тузса, 100 фоизлик бож жорий этиш билан таҳдид қилганди.

Олтин ва бошқа қимматбаҳо металлар одатда «хавфсиз активлар» сифатида қаралади, яъни ноаниқлик кучайган пайтларда инвесторлар айнан шундай активларни сотиб олади. 23 январь куни кумуш нархи ҳам илк бор бир унцияси учун 100 доллардан ошганди. Бу 2025 йили қарийб 150 фоизга ўсишидан кейинги навбатдаги сакраш бўлди.

Қимматбаҳо металларга бўлган талабнинг ошишига яна бир қатор омиллар сабаб бўлмоқда. Жумладан, инфляциянинг одатдагидан юқори бўлиши, АҚШ долларининг заифлашуви, марказий банклар олтин харидини кўпайтиргани ва АҚШ Федерал захира тизими фоиз ставкаларини пасайтириши кутилаётгани бунга таъсир қилмоқда.

Олтиннинг энг катта жозибадор жиҳатларидан бири унинг нисбатан камёблигидир. Жаҳон олтин кенгаши савдо ассоциацияси маълумотларига кўра, ҳозиргача фақат 216 265 тонна атрофида металл қазиб олинган.

Бу миқдор уч-тўрт дона олимпия ўлчамидаги сузиш ҳавзасини тўлдиришга етади. Мазкур олтиннинг асосий қисми 1950 йилдан кейин, қазиб олиш технологиялари ривожланиб, янги конлар топилгач олинган.

АҚШ Геология хизмати ҳисоб-китобларига кўра, ер ости захираларидан яна 64 минг тонна олтин қазиб олиш мумкин, аммо яқин йилларда металл етказиб бериш тўхтаб қолиши тахмин қилинмоқда.

«Олтинга эгалик қилганингизда, у облигация ёки акциялар каби бошқа бировнинг қарзига боғлиқ бўлмайди. Акциялар компания фаолиятига боғлиқ бўлса, олтин мустақил актив ҳисобланади», деди АБC Рефинерй компаниясининг институционал бозорлар бўйича глобал раҳбари Николас Фраппелл.