Ўзбекистонда насия савдо дейилаётган дўконлар, аслида, товарларни кредитга бермоқда. Бу ҳақда Марказий банк раиси Тимур Ишметов 28 январь куни Тошкент шаҳрида ўтган матбуот анжуманида маълум қилди.

Тимур Ишметовнинг айтишича, Марказий банк олдига молиявий технологиялар (финтех) йўналишидаги стартапларни ривожлантириш вазифаси қўйилган. Бу орқали кўрсатиладиган молиявий хизматлар турини кенгайтириш кўзланган.

Финтех стартаплари тўғридан тўғри ишлашимиз керак бўлган янги йўналиш ҳисобланади. Айрим ривожланган хорижий давлатлар, масалан, Сингапур ва бошқа давлатларда бу тажриба бор. Ҳозир финтех стартаплар, аслида, банклар ёки бошқа молиявий ташкилотлар кўрсатаётган хизматларнинг бирор турини амалга оширяпти. Дейлик, тўлов хизматларини. Лекин классик ҳолатда тўловни доим банк амалга оширган. Ҳозирги насия савдода аслида одамларга кредит бериляпти. Секин-секин, бутун дунёдаги каби финтехлар банкнинг бирор-бир хизматини ўз зиммасига оляпти. Шунинг учун биз бу жараёнга қарши курашмасдан, соҳани ривожлантириш бўйича масъул бўлишимиз керак, деди Марказий банк раиси.

Тимур Ишметов ҳозирги шароитда насия савдо каби молиявий хизматлар кўрсатилгач, маълум хатарлар юзага келиши мумкинлигини таъкидлади. Уларга имконият яратиш билан бирга, финтех стартапларни ривожлантириш муҳимлиги билдирилди.

Марказий банкнинг регулятив ва технологик «қумдон»ини бериб, улар кўрсатаётган хизматлар турини кенгайтиришимиз керак. Лекин бу маҳсулотлар аҳолига тўғри тақдим этилишини, молиявий секторда учраши мумкин бўлган хатарларни бирга бошқариш йўлидан бориш лозим. Менимча, шу тўғри йўл, деди регулятор раҳбари.