Вазирлар Маҳкамасининг қарори билан айрим тоифадаги талабаларнинг давлат олий таълим ташкилотлари талабалар турар жойларидаги яшаш харажатларини қоплаб бериш тартиби тўғрисидаги низом тасдиқланди.

Талабаларга турар жой харажатлари қуйидаги ҳолатларда давлат бюджетидан қопланади:

• фақат давлат олий ўқув юртларида ўқийдиганларга;
• кундузги бўлимда ўқийдиганларга;
• давлат гранти ёки тўлов-контракт асосида ўқитилишидан қатъи назар;
• Ижтимоий реестрнинг «камбағаллик чегарасидаги оила» аъзоси бўлганларга.

Бундай талабалар олий таълим ташкилотлари ётоқхоналарига навбатдан ташқари қабул қилинади.

Талабгор ушбу масала юзасидан ойнинг 7-санасига қадар олий таълим ташкилоти ректори (филиал директори) номига ариза билан мурожаат этади.

Талабгор комиссияга аризани kontrakt.edu.uz сайти орқали мустақил равишда ҳам юбориши мумкин.

Ариза тегишли ўқув йили учун бир марта берилади.

Факультетлар деканларининг ёшлар билан ишлаш бўйича ўринбосарлари (мутасадди шахслар) электрон шаклда юборилган аризаларни бир кун ичида умумлаштириб, белгиланган тартибда комиссияга тақдим этади.

Мутасадди шахслар томонидан тақдим этилган аризалар бир кун ичида комиссия томонидан ўрганилади ва тегишли қарор қабул қилинади.

Ҳужжат Қонунчилик маълумотлари миллий базасида давлат тилида эълон қилинган ва 29.01.2026 йилдан кучга кирган.