Ўтган йили Ўзбекистонда аҳоли ва банклар ўртасида жами 33,6 миллиард доллар эквивалентида чет эл валюталари олди-сотди қилинган. Марказий банк таҳлилига кўра, энг кўп савдолар АҚШ доллари билан амалга оширилган.

Таҳлилдан тўққиз турдаги хорижий валюталар олди-сотдисига оид рақамлар келтирилган. Масалан, ўтган йили ўзбекистонликлар банкларга 21,47 миллиард АҚШ доллари сотган. Бу 2024 йилдаги 16 миллиард долларлик савдоларга нисбатан сезиларли кўп. Шу билан бирга, ўтган йили аҳоли банклардан 11,8 миллиард доллар харид қилган. Бир йил олдинги кўрсаткич эса 9,3 миллиард доллар эди. Яъни 12 ой ичида доллар сотиш ва сотиб олиш ҳажми сезиларли ошган.

Ўтган йил давомида банклар жисмоний шахслардан 108 миллион евро сотиб олган (бир йил илгари 67,1 миллион евро эди). Ўз навбатида 95 миллион евро сотган (2024 йилдаги кўрсаткич 86,9 миллион евро бўлган).

Қиймат жиҳатдан кейинги йирик савдолар Россия рубли билан бўлган. Йил мобайнида аҳоли банкларга 3,5 миллиард рубль сотган (йиллик ўсиш бир миллиард рубль), банклардан эса 2,5 миллиард рубль харид қилган (бир йил олдингидан 500 миллион рублга кўп).

Қозоғистон тенгеси билан савдо ҳажми ҳам ошган. 2025 йилда аҳоли банкларга 1,2 миллиард тенге (2024 йилда 805 миллион тенге) сотиб, 909,5 миллион тенге (бир йил олдин 520,7 миллион тенге) харид қилган.

Япония иенаси билан савдолар ҳам бироз кўпайган. Ўтган йили банклар аҳолидан 97,6 миллион Япония иенаси сотиб олган бўлса (2024 йилда 90,8 миллион иена), 29,5 миллион иена сотган (бир йил аввалги савдо 21,8 миллион иена).

Англия фунт стерлинги, Швейцария франки, Турк лираси ва Юань ренминби каби валюталар савдоси нисбатан кам улушни ташкил этган.