Президент урбанизация ва уй-жой қурилишида янгича ёндашувларни жорий этиш юзасидан тақдимот билан танишган эди. Урбанизация ва уй-жой бозорини барқарор ривожлантириш миллий қўмитаси раиси Шерзод Кудбиев йиғилишда 2025 йилда 106,5 мингта янги квартира қурилиб, фойдаланишга топширилгани, бу Ўзбекистоннинг замонавий тарихидаги энг юқори кўрсаткич эканини таъкидлади.

«Табиий ўсиш учун бизга 93,5 мингга яқин хонадон етишмаяпти. 2040 йилгача киши бошига тўғри келадиган уй-жой майдони кўрсаткичини 23 кв.метрга етказишимиз учун 280 минг хонадонгача чиқишимиз керак. Биз ўз олдимизга ушбу маррани қўйдик ва унга эришамиз. Ўтган йили 106,5 мингта хонадон кадастрдан ўтказилди», — деди у.

Кудбиевнинг сўзларига кўра, президент фармони лойиҳасида кўзда тутилган асосий янгиликлардан бири уй-жой қурилиши дастурларини режалаштириш бўлади. Янги тизим аниқ муддатларга боғланган ҳолда қурилишни батафсил режалаштиришни назарда тутади, шунингдек, қурилиш лойиҳаларини ташаббус қилиш ва келишиш тартибини белгилайди. Бюджет жараёни каби 3 йиллик прогноз ишлаб чиқилади.

Прогнозга кўра, 2026 йилда 140 минг, 2027 йилда 150 минг, 2028 йилда 160 минг хонадонли янги уй-жойлар қурилиши режалаштирилган.